Şu günler Türkmenistanda howanyň temperaturasy gündizlerine 40 gradusdan aşýan mahaly, Aşgabatda we Balkan welaýatynda raýatlaryň, hususan-da çagalaryň arasynda güýçli içgeçme we dem alyş ýollary keseli ýaýraýar. Häkimiýetler aşa yssy howanyň ilat arasyndaky netijeleri barada maglumat bermeýärler.
“Howanyň gyzmagy bilen, Türkmenbaşy we Balkanabat şäherlerindäki çagalaryň arasynda wirusdan bolýan gyzdyrma, içgeçme keselleri ýaýraýar. Çagalaryň arasynda agyr näsaglar hem köpeldi. Ölüm hadysalary hem hasaba alynýar” diýip, welaýatyň saglyk bölüminiň bir işgäri Azatlyk Radiosynyň habarçysyna gürrüň berdi.
Syrkaw çagalaryň köpüsine hassahanalarda ýatyp bejergi almak maslahat berilýär. Ýöne näsaglaryň köpdügi sebäpli keselhanalarda ýer tapdyrmaýar.
Degişli maglumat Aşa yssy howada keselhana düşýän raýatlar köpelýär, ýangynlar döreýär, mallar haram ölýär“Näsaglar hassahanalaryň we saglyk öýleriniň daşynda nobata durup, jokrama yssyda lukmanyň kabulyna garaşýarlar. Lukmanlar ýetişip bilmeýärler. Girelgeler hem doly. Şu günler köp hassahana bazar ýerini ýadyňa salýar. Lukmanlar syrkaw çagalaryň köpüsine antibiotikleri ýazyp berip, öýlerinde bejergi almagy tabşyrýarlar” diýip, habarçymyz aýtdy.
Aşgabatda hem, aşa yssyda dem alyş ýollary arkaly ýokuşýan keselçilik juda köp adamyň, esasanam çagalaryň arasynda ýaýraýar.
Maşgala lukmanlarynyň birnäçesiniň aýtmagyna görä, bu syrkawlary iki topara bölüp bolýar. Olaryň birinji topary burnunyň akmagyndan, üsgülewükden, gyzzyrmadan şikaýat edýär. Ikinji topar bolsa, ýürek bulanmadan, içege agyrysyndan we ysgynsyzlykdan ejir çekýär.
“Bu iki toparda hem, keselçiligiň aram we agyr görnüşleri bar. Häzir paýtagtyň ýokanç keseller hassahanasy ikinji görnüşdäki näsaglardan doly. Bu näsaglar içege agyrysyndan we içgeçmeden ejir çekýärler” diýip, ýerli lukman habarçymyza gürrüň berdi.
Azatlyk bu ýagdaýlar barada Aşgabadyň we Balkanyň saglyk bölümlerinden we ýokanç keseller hassahanalaryndan kommentariýa alyp bilmedi.
Balkanyň hassahanalarynyň biri. Iýul, 2023 ý.
Bu aralykda, paýtagtdaky habarçymyz keselçiligiň ýaýramagy bilen, şäheriň dermanhanalarynda derman satyn almak isleýän adamlaryň uly nobatlarynyň emele gelendigini hem aýtdy.
“Dermanhanalaryň we Tiz kömek gullugynyň işgärleri gaýtadan maska dakynyp başladylar” diýip, habarçymyz belledi.
Türkmenistanyň dürli sebitlerinde indi bir hepde gowrak wagt bäri aşa yssy howa akymy dowam edýär. Azatlyk bu döwürde keselhana düşýän çagalaryň we garrylaryň sanynyň göz-görtele köpelendigi, köpçülikleýin gyrylýan mallar, aşa yssy howanyň köçeleriň asfaltyny we elektrik simleri eredýändigi barada habar berip gelýär.
Balkanyň hassahanalarynyň biri. Iýul, 2023 ý.
Häkimiýetler we resmi media aşa yssy howanyň ilat arasyndaky netijeleri barada hiç zat aýtman gelýärler.
“Watan” habarlary gepleşiginiň 19-njy iýulda efire berlen sanynyň soňunda-da, hiç hili aýdyňlaşdyryjy maglumat berilmezden, ýurtda “hereket edýän şahsy we jemgyýetçilik arassaçylyk tertip-düzgünlerini berjaý etmek maslahat berilýär”.
"Türkmenistan" gazetiniň soňky sanynda hem, 20-nji iýulda ýurtda bolmagyna garaşylýan howanyň ýagdaýy barada maglumat berlip, iň ýokary temperaturanyň 40 gradus boljakdygy we munuň Lebap welaýatynda hasaba alynjakdygy bellenilýär.
Howa maglumatlaryny çap edýän “Meteožurnal” neşiri 19-njy iýuldaky habarynda Türkmenistanyň ençeme sebitinde aşa yssy howanyň dowam edýändigini, Lebabyň käbir sebitlerinde temperaturanyň 46 gradusa çenli ýetýändigini habar berdi.
Degişli maglumat Howa gyzýar, lukmanlar yssy howanyň kadalaryny berjaý etmegi maslahat berýärGadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.