Ak tam Birleşen Arap Emirliklerinde bir Ysraýyl-Moldowan ruhanysynyň öldürilmegini ýazgardy, Ysraýyl bu hüjümi anti-semit "terror hüjümi" diýip atlandyrdy.
"Bu parahatçylygyň, çydamlylygyň we bilelikde ýaşamagyň tarapdarlarynyň ählisine garşy edilen aýylganç jenaýat boldy. Şeýle-de, bu Birleşen Arap Emirliklerine, onuň zorlukly ekstremizmi ret etmegine garşy edilen hüjüm boldy" diýip, Ak tam 24-nji noýabrda çap eden beýanatynda aýtdy.
Ýerli häkimiýetler birnäçe sagat öň Birleşen Arap Emirliklerinde işlän we Zwi Kogan diýlip tanalan adamyň öldürilmeginde güman edip, üç şübheliniň tussag edilendigini aýtdylar.
Kogan ýewreý myhmanlaryny we bu ýurtda ýaşaýan ýewreýleri goldaýan prawoslaw ýewreý toparynda, Çabadda işleýän eken.
Pidanyň 22-nji noýabrda ýitirim bolandygy habar berildi. Onuň jesedi Omani serhediniň golaýyndaky Al Aýn şäherinde tapyldy. Ýöne onuň nirede öldürilendigi belli däl.
BAE-niň Içeri işler ministrligi bu işde güman edilýänler barada goşmaça maglumat bermedi.
Ysraýylyň premýer-ministri Benýamin Netanýahuyň edarasy hem 28 ýaşly rabbiniň öldürilmegini ýazgardy we muny "anti-semit terrorçylyk hereketi" diýip atlandyrdy.