Birleşen Ştatlar, Fransiýa we käbir beýleki ýaranlar Ysraýyl-Liwan serhedinde dessine 21 gün möhlet bilen ok atyşyklaryň bes edilmegine çagyrdylar, şeýle-de Gazadaky ok atyşyklary togtatmak boýunça berk goldawyny äşgär etdiler. Bu 25-nji sentýabrda BMG-de geçirilen gyzgalaňly gepleşikleriň netijeleri boýunça edildi.
Ok atyşyklary bes etmek Liwan bilen Ysraýylyň arasyndaky demarkasiýa zolagy bolan Ysraýyl-Liwan “Gök çyzygyny” göz öňünde tutýar. Munuň çäginde taraplar konflikte mümkin diplomatiki çözgüdi tapmak boýunça ylalaşyp bilerler diýip, Baýden administrasiýasynyň ýokary derejeli resmisi aýtdy.
Bilelikdäki beýanata başga-da Awstraliýa, Birleşen Arap Emirlikleri, Saud Arabystany we Ýewropa Bileleşigi gol goýdy.
25-nji sentýabrda Ysraýyl Liwana urýan zarbalarynyň gerimini giňeltdi. Reuters gullugynyň Liwanyň Saglyk ministrligine salgylanyp habar bermegine görä, bu zarbalarda azyndan 72 adam heläk bolupdyr. Ministrlik mundan öň azyndan 223 adamyň ýaralanandygyny aýdypdy.