ABŞ-nyň Türkmenistanda täze bellenen adatdan daşary we doly ygtyýarly ilçisi Elizabet Rud çarşenbe güni prezident Serdar Berdimuhamedowa ynanç hatyny gowşuryp, türkmen ýolbaşçylaryna ABŞ-nyň prezidenti Jozef Baýdeniň iň gowy arzuwlaryny ýetirdi we öz ýurdunyň däp bolan dostlukly döwletara gatnaşyklary pugtalandyrmaga gyzyklanma bildirýändigini tassyklady.
Türkmen prezidenti hanym Elizabet Rudy ýokary diplomatik wezipä bellenilmegi bilen gutlap, oňa işinde üstünlik arzuw etdi we Türkmenistanyň özara düşünişmek, hormat goýmak, ynanyşmak ýörelgeleri esasynda ikitaraplaýyn gatnaşyklaryň giňeldilmegine uly ähmiýet berýändigini aýtdy.
Duşuşygyň dowamynda döwletara dialogynyň netijeli häsiýeti kanagatlanma bilen bellenildi. Şunuň bilen birlikde, özara bähbitli ykdysady hyzmatdaşlygy ösdürmek üçin uly mümkinçilikleriň bardygy nygtaldy diýip, habarda bellenýär.
Diplomat Türkmenistanda ABŞ-a wekilçilik etmegiň özi üçin uly hormatdygyny nygtap, döwletara hyzmatdaşlygyny pugtalandyrmak, ony hil taýdan täze derejä çykarmak üçin hemmetaraplaýyn ýardam etjekdigine ynandyrdy.