Daşoguz welaýatynyň Görogly etrabyndaky ýol heläkçiliginde üç mekdep okuwçysynyň ölümine sebäp bolmakda aýyplanýan polisiýa işgäri uzak möhletleýin türme tussaglygyna höküm edildi. Welaýatdaky habarçymyz we ygtybarly çeşmelerimiz sebitde jenaýata baş goşan kanun goraýjylara bu hili jezanyň örän seýrek berilýändigini aýdyp, suduň bu karary çykarmagyna betbagtçylygyň Azatlyk Radiosynda köpçülige äşgär edilmeginiň täsir edendigini aýdýarlar.
"Kanun goraýjylar we polisiýa işgärleri heläkçilige sebäp bolan uly leýtenanty türmä basmajak bolup, onuň psihikasynyň üýtgändigi barada galp maglumatlary taýýarlap, ony Ýylanlydaky ruhy taýdan näsag hassalaryň bejergi alýan keselhanasynda saklap gelipdirler. Ýöne geçen hepdäniň duşenbe güni, ýagny 8-nji maýda Görogly etrap kazyýetinde duýdansyz açyk sud geçirilip, uly leýtenant 18 ýyl türme tussaglygyna höküm edildi" diýip, habarçymyz aýtdy.
Azatlykda gürrüňi edilýän polisiýa işgäriniň şahsyýetini anyklaýan maglumatlar bolsa-da, ony köpçülige mälim etmekden saklanýar.
Degişli maglumat Daşoguzda bolan ýol heläkçiliginde üç mekdep okuwçysy öldiÝatlatsak, musulmanlaryň mukaddes Remezan aýynda, 5-nji aprelde gije sagat 11 töwereginde etrabyň "Bedirkent" daýhan birleşiginde ýerli polisiýa bölüminiň uly leýtenanty serhoş ýagdaýda gulluk wezipesini ýerine ýetirýän mahaly, ulagy aşa ýokary tizlikde dolandyrýar we ony tarawa namazyndan soň, ýoluň gyrasyndan öýlerine ýöräp barýan bäş adamyň üstüne sürýär. Şonda adamlaryň iki sanysy gaçyp ýetişýär, ýöne üç ýaş oglan ulagyň aşagynda galýar. 10-njy we 11-nji synplarda okaýan iki okuwçy wakanyň bolan ýerinde heläk boldy. Şeýle-de, ýene bir okuwçy etrap hassahanasynda aradan çykdy.
Şonda habarçymyz polisiýa işgäriniň heniz tussag edilmändigini aýdyp, merhumlaryň hossarlarynyň bu ýagdaýdan nägiledigini we leýtenantyň uzak möhletleýin türme tussaglygyna höküm edilmegini isleýändigini belläpdi.
Habarçymyzyň we çeşmämiziň sözlerine görä, ýol heläkçiliginiň yzysüre, polisiýa işgäri waka şaýat bolan oba ýaşaýjylary tarapyndan "belli bir derejede urlup-ýenjilipdir". Ol saglyk resmilerinden "agyr şikes alandygy" barada resminamalary alypdyr.
"Ol ruhy saglygynyň kadaly däldigi barada "galp resminamalary" hem taýýarlap, ruhy taýdan näsaglaryň bejergi alýan hassahanasyna ýatmagy-da başarypdyr. Ýöne ýol heläkçiligi barada Azatlykda berlen maglumatdan soň, onuň bu hilesi netije bermändir. Sebäbi Azatlykda bu betbagtçylygyň äşgär edilmeginden soň, bu meselä ýokary derejeli döwlet resmisiniň gatyşandygy we onuň ýokary kazyýete polisiýa işgärine adalatly jeza berilmegini üpjün etmegi tabşyrandygy aýdylýar. Şol sebäpli gyssanmaç sud geçirildi" diýip, ýagdaýdan habarly ynamdar çeşmämiz aýtdy.
Sebitde jenaýata baş goşan kanun goraýjylara bu hili jezanyň örän seýrek berilýändigini aýdýan habarçymyzyň tassyklamagyna görä, merhumlaryň hossarlary polisiýa işgärine adalatly jeza beriljeginden umytlaryny üzen eken.
Degişli maglumat Farapda bolan ýol heläkçiliginde iki adam öldi"Daşoguzda adam ölümine sebäp bolýan kanun goraýjy edaralaryň işgärleriniň adalatly jezalandyrylmagy tas mümkin däl. Mekdep okuwçylarynyň heläkçiligine jogapkär polisiýa işgäriniň uzak möhletleýin türme tussaglygyna höküm edilmegi, sebitde adam pidasyna sebäp bolan kanun goraýja adalatly jeza berilmegi bilen bagly seýrek wakalaryň biri boldy" diýip, habarçy aýtdy.
Mundan ozal, daşoguzly ýaşaýjylaryň ençemesi wezipe borçlaryny ýerine ýetirýän mahaly, serhoş ýagdaýda ýol hadysalaryna we adam pidalaryna sebäp bolan polisiýa işgärleriniň tussag edilenden üç-alty aý soň günä geçişlikde azatlyga goýberilýändigini aýdypdy.
Azatlyk bu aýdylanlar barada etrap kazyýetinden we ýerli polisiýa bölüminden goşmaça maglumat ýa kommentariýa alyp bilmedi.
Türkmen häkimiýetleri we berk döwlet gözegçiligindäki media serişdeleri adatça ýurtda bolýan ýol heläkçilikleri, olaryň jogapkärlerine berilýän jeza barada maglumat bermeýärler. Ýol hadysalarynda ýylda näçe adamyň wepat bolýandygy baradaky statistika hem mälim edilmeýär.
Ýöne Azatlygyň habarçylary we garaşsyz neşirler adam pidalaryna getirýän köçe-ýol, otly betbagtçylyklary barada ýygy-ýygydan maglumat berýärler.
Şu aýyň başynda Azatlygyň Lebap welaýatyndaky habarçysy Farapda bolan ýol heläkçiliginde iki adamyň ölendigini habar berdi.
Degişli maglumat Aşgabatda awtoulag heläkçiliginde iki mekdep okuwçysy öldiGadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.