Russiýanyň prezidenti Wladimir Putin türkmen kärdeşi Serdar Berdimuhamedowy Ikinji Jahan urşunyň tamamlanmagynyň 78 ýyllygy mynasybetli Moskwada geçirilmegi meýilleşdirilýän çärelere gatnaşmaga çagyrdy.
Putin bu çakylygyny 7-nji maýda türkmen prezidenti bilen geçiren telefon arkaly söhbetdeşliginde mälim etdi.
Serdar Berdimuhamedow çakylyk üçin minnetdarlyk bildirdi. Ýöne TDH-niň maglumatynda onuň Moskwada geçirilmegi meýilleşdirilýän çärelere gatnaşjakdygy ýa-da gatnaşmajakdygy barada hiç zat aýdylmady.
Russiýa Ikinji Jahan urşunyň tamamlanmagy mynasybetli Ýeňiş gününi 9-njy maýda belleýär we her ýyl bu çärelere daşary ýurt ýolbaşçylaryny çagyrýar.
Ýöne 2014-nji ýylda Moskwanyň Krym ýarym adasyny Ukrainadan bikanun anneksiýa etmeginiň yz ýany, bu çärelere gatnaşýan daşary ýurt liderleriniň sany azaldy.
Geçen ýyl, Russiýanyň Ukraina çozmagyndan iki aý geçenden soň, Moskwada geçirilen Ýeňiş güni çärelerine daşary ýurt ýolbaşçylary gatnaşmady.
Türkmenistanda 1939-njy ýylda başlanan Ikinji Jahan urşunyň 1941-1945-nji ýyllar aralygy, sowet propagandasyna laýyklykda “Beýik Watançylyk urşy” atlandyrylyp, 9-njy maýda Ýeňiş güni bellenilýär.