Şu günler köp lebaply Aşgabada baryp gelmekde kynçylyk çekýär. Muňa Türkmenabat-Aşgabat we Aşgabat-Türkmenabat aralygy üçin uçar, otly we awtobus biletleriniň ýetmezçiligi sebäp bolýar.
"Uçar reýsleri we otly gatnawlary ýolagçylaryň talabyny ödäp bilmeýär. Bilet tapmak uly problema. Häzir kimi görseň, bilet tapyp bilmeýändigini aýdýar" diýip, Azatlyk Radiosynyň Lebap welaýatyndaky habarçymyz 13-nji aprelde aýtdy.
Ol sebitden paýtagta awtobusda gitmegiň hem uly problemadygyny belläp, awtobus biledini tapan ýolagçylaryň bu transport ugry boýunça saparynyň dowamlylygynyň 11 sagada çekýändigini aýtdy.
Degişli maglumat "Otluda 12 sagatlap dik aýak üstünde gitdim”"Türkmenabadyň täze awtomenzilinden ugraýan awtobusda Aşgabada gitmek üçin irden sagat 6-da baryp, nobata durmaly. Sagat 7-de ýolagçylar awtobusa mündürilip başlanýar. Eger awtobusa münüp bilseň, onda ol sagat 8-de Aşgabada ugraýar. Bahasy 65 manat bolan bilediň puluny awtobus sürüjisiniň eline tölemeli. Sekiz sagatdan soň, awtobus Ahalyň Änew şäherine barýar. Ýolagçylar Änewde awtobusdan düşüp, goşmaça çykdajy edip, Aşgabada degişli döwlet belgisi bolan taksä münmeli. Başga welaýatlara degişli döwlet belgisi bolan taksiler paýtagta goýberilmeýär. Ýolagçylar takside ýene bir sagat gitmeli" diýip, habarçy belledi.
Hökümet maslahatlarynda transport serişdeleriniň gatnawlarynyň kämilleşdirilýändigi ýygy-ýygydan tekrarlanylýan Türkmenistanda ilat uçar we otly biletleriniň ýeter-ýetmezçiligi bilen ýyllarboýy ýüzbe-ýüz bolup gelýär. Bu ýetmezçilik wagtal-wagtal, hususan-da uly baýramçylyklaryň öňüsyrasynda ýa-da dynç alyş möwsüminde has-da güýçlenýär.
Habarçymyz bilet ýetmezçiliginiň nobatdaky gezek möwjemeginiň sebäbini sebitde daşary ýurtlara gitmek isleýän raýatlaryň göz-görtele köpelendigi bilen düşündirýär.
"Munuň bilen baglylykda, daşary döwletlere wiza almak üçin her gün ýüzlerçe adam Aşgabada gidip gelýär. Olaryň köpüsi ýeke gitmeýär. Olar öz ýanlary bilen wiza almaga kömek edýän ýörite adamlary hem alyp gidýärler. Raýatlar bu adamlara 1 müň manat töleýärler" diýip, habarçy belledi.
Degişli maglumat Lebapda daşary ýurtlara wiza we bilet alyp berýän 'araçylar' peýda boldySoňky aýlarda, hususan-da pandemiýa çäklendirmeleri sebäpli ýatyrylan halkara howa gatnawlarynyň dikeldilip başlanmagy bilen, eklenç gözleginde daşary ýurtlara gitmek isleýän türkmenistanlylaryň sany göz-görtele köpeldi. Döwlet Migrasiýa gullugynyň edaralarynyň öňünde biometriki pasport almak isleýän raýatlaryň uly nobatlary döredi.
Geçen aýyň ahyrynda Lebapdaky habarçylarymyz, ýurtda dowam edýän ýiti ykdysady kynçylyklaryň arasynda, Saýat, Halaç, Sakar we Çärjew etraplaryndan has köp adamyň eklenç gözleginde daşary ýurtlara, hususan-da, Stambul, Kazan we Dubaý şäherlerine gidýändigi barada maglumat berdiler.
Degişli maglumat Daşoguzda bolan ýol heläkçiliginde üç mekdep okuwçysy öldiGalyberse-de, Lebapdaky habarçymyz soňky aýlarda ýol heläkçilikleriniň köpelmegi zerarly köp adamyň uçarda ýa-da otluda sapar etmäge ýykgyn etmeginiň hem, sebitde bilet ýetmezçiliginiň möwjemegine sebäp bolýandygyny aýtdy.
Soňky aýlarda Azatlygyň dürli sebitlerindäki habarçylary adam pidalaryna getiren ýol hadysalary barada ençeme gezek maglumat berdiler.
Geçen hepde Daşoguz welaýatynyň Görogly etrabynda bolan ýol heläkçiliginde kämillik ýaşyna ýetmedik üç mekdep okuwçysy heläk boldy. Mart aýynyň başynda Türkmenabat-Mary awtomagistralynda iki ýeňil awtoulagyň pete-pet gelip çakyşmagy netijesinde ýedi adam öldi.
Azatlyk Lebapda emele gelen bilet ýetmezçiligi barada ýurduň "Demirýollary" açyk görnüşli paýdarlar jemgyýetinden we "Türkmenistan howaýollary" kompaniýasyndan kommentariýa alyp bilmedi.
Degişli maglumat Mary – Türkmenabat ýolunda heläk bolanlaryň arasynda är-aýal hem bar
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň gizlinligini doly kepillendirýär.