Aşgabatda 1-nji martda şahyr Gurbannazar Ezizowyň doglan gününe bagyşlanan edebiýat agşamy geçirildi.
“Türkmenportal” bu habary Türkmenistanyň Oguzhan adyndaky Inžener-tehnologiýalar uniwersitetiniň mugallymlaryna salgylanyp çap etdi.
“Şahyr üçin bu dünýeden gitme ýok” diýen at bilen geçirilen edebiýat agşamyna unwersitetiň Tehniki ugurlar boýunça daşary ýurt dilleri we Jemgyýeti öwreniş ylymlary kafedralarynyň mugallymlary we talyplary gatnaşdy.
Agşamyň dowamynda şahyryň döredijiligi, durmuşy barada gürrüň edildi, goşgulary okaldy we sahnalaşdyryldy, aýdym bolan eserleri “talyp ýaşlar tarapyndan uly höwes bilen ýerine ýetirildi”.
1-nji martda, uniwersitetdäki sapaklar başlanmazyndan öň, radiouzellerde şahyryň ömri we döredijiligi barada iňlis dilinde gysgaça gürrüň berildi, onuň “Maňa seniň gözleriňden gitme ýok” atly goşgusy türkmen we iňlis dillerinde labyzly okaldy diýip, habarda aýdylýar.
Gurbannazar Ezizow ýaşap ýören bolsa, 1-martda 83 ýaşynyň toýuny toýlamalydy.
Ol 1975-nji ýylyň 20-nji sentýabrynda, Sowet Soýuzynyň ýaş şahyrlarynyň häzirki türkmenbaşy şäherinde geçirilýän duşuşygyna gatnaşmaga barýarka, Gazanjygyň golaýynda sowet esgeri tarapyndan atylyp öldürildi.
Degişli maglumat Döwrüň ýüzüne garap ýazylan terjimehal