Gündogar Türkiýede we goňşy Siriýada bolan güýçli ýer titremesinde ýykylan binalaryň harabalygynyň aşagynda galan adamalary halas etmek işleri dowam etdirilýär.
6-njy fewral güni irden bolan 7,8 bally ýer titremesinde 5000-den gowrak adamyň ölendigi habar berildi.
Türkiýäniň prezidenti Rejep Taýyp Erdogan ýedi günlük milli ýas yglan etdi.
Hataý sebitinde resmiler 1500-e çenli binanyň weýran bolandygyny we hiç bir kömek ýa-da halas ediş topary gelmänsoň, köp adamyň harabalygyň aşagynda galandygyny habar berdiler.
Hataý sebitinde müňlerçe adam sport merkezlerinde ýa-da bazar zallarynda gaçybatalga tapdy, beýlekiler gijäni daşarda geçirmäge mejbur boldular.
Dünýä ýurtlary halas ediş işlerine kömek bermek üçin öz toparlaryny iberdi, emma şu wagta çenli hadysanyň bolup geçen ýerine gelip ýeten gyssagly kömek işgärleri az.
Howanyň aşa sowuk bolmagy we ýer yranmasyndan soň bolan 200-e golaý sarsgyn gözleg işlerine bökdençlik döredýär.
Türk häkimiýetleriniň habaryna görä, Türkiýäniň 10 sebitinde azyndan 3419 adam ölüp, 16,000 töweregi adam ýaralandy.
Saglygy goraýyş ministrliginiň habaryna görä, Siriýada hökümetiň gözegçiligindäki sebitlerde ölenleriň sany 812 adama ýetdi, 1400 töweregi adam ýaralandy.
Türkmenistanyň prezidenti Serdar Berdimuhamedow, Halk maslahatynyň başlygy Gurbanguly Berdimuhamedow bu hadysa sebäpli Türkiýäniň prezidenti Rejep Taýyp Ärdogana, Siriýanyň prezidenti Başar Al-Asada gynanç bildirdi diýip, TDH habar berýär.
Şeýle-de, Türkmenistanyň daşary işler ministri Raşid Meredow bilen Türkiýe Respublikasynyň daşary işler ministri Mewlut Çawuşoglunyň arasynda telefon söhbetdeşligi boldy diýip, Türkmen DIM-niň web sahypasy habar berýär.
Meredow Türkiýede köp adamyň ölmegine we ýaralanmagyna sebäp bolan ýer titremesi bilen baglanyşykly türk kärdeşine duýgudaşlyk we goldaw bildirdi diýip, habarda aýdylýar.
Ýertitreme zerarly ejir çekenlere kömek toparyny we zerur bolan önümleri daşaýan uçar sişenbe güni irden Aşgabatdan Türkiýä ugrady diýip, “Biznes Türkmenistan” neşiri Türkiýäniň Türkmenistandaky ilçisi Togan Oralyň twitter sahypasyna salgylanyp habar berdi.