Mary sebitinde Täze ýyl baýramçylygynyň dowamynda güýçlendirilen polisiýa gözegçiligi we sebit merkezinde kiçi ýaşly çagalaryň sowuk howada döwlet guramaçylygynda geçirilen baýramçylyk çärelerine çekilmegi adamlaryň baýram şatlygyna kölege saldy. Baýramçylyk howasy tutuk geçdi.
Azatlyk Radiosynyň habarçylary we çeşmeleri Täze ýyl baýramçylygynda sebitde tas komendant sagady ýaly howanyň höküm sürendigini aýdýarlar.
Bu ýagdaý, hususan-da, sebit merkezinde okuwçy ýaşlaryň baýramçylyk günlerindäki hereketlerine polisiýanyň we mekdep mugallymlarynyň gözegçilik maksatly gatyşmagy bilen has aýdyň göründi.
Bir tarapdan okuwçy ýaşlaryň hereketi çäklendirildi, beýleki tarapdan, sebit merkezinde döwlet guramaçylygynda geçirilýän baýramçylyk çäresine käbir mekdeplerden okuwçy ýaşlar mejbury çekildi.
“Mugallymlar okuwçylaryň ene-atalaryna ýeke-ýekeden jaň edip, kanikulda okuwçylary hiç ýere çykarmazlygy, olara esewan etmegi, göz-gulak bolmagy tabşyrdylar. Täze ýyl güni çagalara şäherde gurnalan Täze ýyl arçasyna gezelenje gitmeklik, olara öz dostlarynyň öýlerine baryp görmeklik gadagan edildi” diýip, Mary şäheriniň ýaşaýjysy gürrüň berdi.
Degişli maglumat Türkmen TW-si Türkmenabatda wideo düşürýär we 'gelşikli' gatnaşyjylary saýlaýar31-nji dekabrda we 1-nji ýanwarda mekdep ýaşlaryndaky çagalaryň diňe ene-atalary bilen bilelikde şäherde gezelenje çykmagyna rugsat berildi. Özbaşdak köçä çykýan ýaş ýetginjekler polisiýa tarapyndan barlandy.
Marynyň administratiw merkezinde Azatlygyň habarçysy bilen gürrüňdeş bolan bir topar ýetginjek ýaşlar Täze ýyl güni Marynyň köçelerinde özleriniň polisiýa tarapyndan saklanyp, jübüleriniň we jübi telefonlarynyň barlanandygyny gürrüň berdiler.
Ýaş ýetginjekleriň jübüleriniň barlanmagy polisiýanyň howpsuzlygy üpjün etmek tagallalary bilen, galyberse-de, ýaşlaryň jübüsinde baýramçylyk paňkyldawaçlarynyň bardygyny ýa-da ýokdugyny anyklamak synanyşyklary bilen düşündirilýär.
Ýatlasak, baýramçylygyň öň ýany, ýurduň ähli sebitlerinde içeri işler edaralary gözegçiligi güýçlendirdi. Polisiýa işgärleri we mekdep mugallymlary okuwçy ýaşlaryň arasynda gürrüňdeşlikleri geçirip, baýramçylygyň dowamynda ýasama partlaýjylary ulanmazlyk, baýram paňkyldawaçlaryndan peýdalanmazlyk barada söhbetdeşlik geçdiler.
Täze ýyl baýramynyň yz ýany, Azatlygyň habarçylary bilen gürrüňdeş bolan ýaş ýetginjekler baýramçylykda şatlyk-şowhunyň ýetmezçilik edendigini aýdýarlar.
“Çagalar [Täze ýyl baýramynyň] baýramçylyga meňzemeýändigini. Özlerinde baýramçylyk höwesiniň ýokdugyny aýdýarlar” diýip, bir maryly ýaşaýjy Azatlyk Radiosynyň habarçysyna gürrüň berdi.
“Şäher ýerinde Täze ýyl salýutlary atylmady” diýip, beýleki bir sebit ýaşaýjysy aýdýar.
Bu aralykda, döwlet guramaçylygynda geçirilen çärelere okuwçy ýaşlar, hatda çagalar baglaryna gatnaýan körpeler mejbury çekildi.
“Käbir mekdepleriň okuwçylary welaýatyň Täze ýyl arçasynyň ýanynda geçirilen we döwlet telewideniýesinde görkezilmeli baýramçylyk çäresine çekildi. Hatda bu çärä çagalar bagynyň körpeleriniň hem gatnaşdyrylandygy aýdyldy. Çagalary birnäçe sagatlap, sowukda sakladylar” diýip, şäher ýaşaýjylary Azatlyk Radiosynyň habarçysyna gürrüň berdiler.
Degişli maglumat Täze ýylyň öň ýanynda, Lebapda howpsuzlyk çäreleri güýçlendirilýärÝatlasak, 2022-nji ýyla geçilen gije Lebap welaýatynyň Çärjew etrabynda öý şertlerinde ýasalan partlaýjylaryň ýarylmagy netijesinde bolup geçen heläkçilikli hadysa adam pidalaryna we ýaralanmalara getirdi.
Adatça, adam pidalaryna getirýän betbagtçylykly hadysalary boýun almaýan Türkmenistanyň döwlet ýolbaşçylary, bir ýyl ozal, baýramçylygyň yz ýany geçiren Howpsuzlyk geňeşiniň mejlisinde Çärjewde bolan heläkçiligi tassyklady.
Türkmenistanyň güýç edaralarynda möhüm baýramçylyklaryň öň ýany, güýçlendirilen iş tertibi yglan edilýär.
Maryda tutuk bellenip geçilen Täze ýyl baýramynyň öňüsyrasynda, türkmen häkimiýetleri mekdeplerde we býujet edaralarynda yzly-yzyna howpsuzlyk ýygnaklaryny geçirip, baýramçylykda emeli partlaýjylaryň partladylmazlygy, býujet işgärleriniň kafelerde we restoranlarda baýramçylyk üýşmeleňlerini geçirmeginiň gadagan edilmegi ýaly “howpsuzlyk meseleleri” boýunça düşündiriş işlerini geçirdiler.
“Bu ýyl adamlar öýlerinden çykman, Täze ýyl baýramyny bellemeli boldular” diýip, maryly bir býujet işgäri baýramçylygyň yz ýany, Azatlyk Radiosynyň habarçysyna gürrüň berdi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.