Täze ýyl baýramçylygynyň öňüsyrasynda, şu günler häkimiýetler Mary welaýatynda kafeleriň we restoranlaryň iş tertibini çäklendirýär. Bu barada Azatlyk Radiosynyň sebitdäki habarçysy 26-njy dekabrda maglumat berdi.
“Kafeler, barlar we restoranlar agşam sagat 8:30-dan soň, ýapylyp başlanýar. Agşam 9-dan soň, garbanyşhanalarda ýeke adam galmaly däl” diýip, maryly ýaşaýjylar aýdýarlar.
Azatlyk Radiosynyň Mary sebitindäki habarçylary şu günler kafeleriň we restoranlaryň öňünde polisiýa işgärleriniň nobatçylyk çekýändiklerini habar berýärler.
“Bu nä boluş? Bizde bar zat tersine işleýär. Şu günler adamlar restoranlarda we toý mekanlarynda Täze ýyl banketlerini geçirmekçi bolýarlar. Adamlar Täze ýyl baýramçylygynda boldugyndan şatlanmakçy bolýarlar. Edara-kärhanalaryň [banket guraýan] işgärleri gijöýlän sagat 6-da işden çykyp, agşam 8:00 töwereginde bellenen restoranlara gelýärler. Ýaňy bir nahary öňlerine alanlarynda, restorany ýapmak, içindäki adamlary restorandan kowup çykarmak talap edilýär” diýip, maryly bir restoran eýesi Azatlyk Radiosynyň habarçysyna gürrüň berdi.
Degişli maglumat Türkmenistan polisiýa gözegçiligini güýçlendirip, Täze ýyla taýýarlanýarHyzmatlar pudagynda iş alyp barýan telekeçiler polisiýa çäklendirmeleriniň baýramçylygyň bosagasynda özlerini girdejisiz goýýandygyny aýdýarlar.
Bu aralykda, Azatlyk Radiosynyň habarçylary şäheriň gyralaryndaky daçalarda we howly jaýlarynda ýerli ýaşaýjylar tarapyndan özbaşdak guramalaşdyrylýan baýramçylyk üýşmeleňleriniň hem polisiýa gözegçiligine ilýändigini habar berýärler.
“Polisiýa işgärleri hususy hojalyklarda geçirilýän baýramçylyk üýşmeleňlerini hem ýatyrýarlar. Aýdym-sazyň sesini kesmegi talap edýärler” diýip, bir ýerli ýaşaýjy Azatlyk Radiosynyň habarçysyna gürrüň berdi.
Ýöne, eger-de oturylyşyklar wezipli adamlaryň, hukuk goraýjy edaralaryň işgärleriniň ýa-da olaryň tanyşlarynyň gatnaşmagynda geçirilýän bolsa, onda polisiýa şeýle hojalyklara egilişik edýär.
“Hukuk goraýjy edaralarda tanşyň ýok bolsa, agşam sagat 8:30-dan soň, şowhun-şagalaňsyz oturmak talap edilýär” diýip, maryly ýaşaýjylar aýdýarlar.
Azatlyk Radiosynyň habarçylary Täze ýyl baýramçylygyň öň ýany, ýurt boýunça howpsuzlyk çäreleriniň güýçlendirilýändigini, kanun goraýjy edaralarda güýçlendirmeleriň yglan edilendigini habar berip gelýär.
Şol bir wagtda, polisiýa işgärleri we orta mekdepleriň mugallymlary okuwçy ýaşlaryň arasynda düşündiriş işlerine badalga berip, baýramçylyk günlerinde emeli partlaýjylaryň, petardlaryň ulanylmazlygy, köçelerde we köp gatly ýaşaýyş jaýlarynyň töwereginde ot ýakylmazlygy ýaly howpsuzlyk düzgünleriniň berjaý edilmegi barada gürrüňdeşlik geçdiler.
Galyberse-de, döwlet edara-kärhanalarynyň işgärlerine öz başlangyçlary bilen Täze ýyl gijesinde üýşmeleňleri we oturylyşyklary bellemek gadagan edildi.
Bu aralykda, din wekilleri ilat arasynda Täze ýyl baýramçylygyna garşy wagyz-nesihat işerine bat berýärler.
Biraz öň, Azatlyk Radiosynyň habarçylary günbatar Türkmenbaşy we Balkanabat şäherlerinde metjitleriň ymamlarynyň Täze ýyl baýramçylygynyň şowhun bilen bellenilmegine, Täze ýyl arçalaryna dürli görnüşli bezegleriň asylmagyna garşy wagyz-nesihat işlerini güýçlendirýändiklerini habar berdiler.
Edil şeýle çäreler Mary welaýatynyň din işgärleriniň arasynda hem ýaýbaňlanýar.
Degişli maglumat Býujet işgärlerine kafelerde we restoranlarda Täze ýyl üýşmeleňlerini geçirmek gadagan edilýär“Täze ýyl baýramçylygy adamlaryň hakykatdan-da şatlanyp, arzuw edýän baýramçylygy bolup durýar. Emma adamlaryň barja baýramçylyk şagalaňyny alýarlar. Başga baýramçylyklarda öýden hem çykmaýarys” diýip, bir maryly ýaşaýjy Azatlyk Radiosynyň habarçysyna gürrüň berdi.
Bu aralykda, türkmen hökümeti Täze ýyl baýramçylygynyň öňüsyrasynda, daşary ýurt aýdymçylarynyň gatnaşmagynda paýtagt Aşgabatda baýramçylyk konsertlerini gurnaýar.
Galyberse-de, edara-kärhanalaryň ýolbaşçylary Täze ýyl arçalaryna bezeg çyralaryny asmak üçin, býujet işgärlerinden pul toplady.
Türkmenistanda kärhanalarda, guramalarda we edaralarda Täze ýyl baýramy mynasybetli 1-nji ýanwarda işlenilmeýär. Täze ýylyň bosagasynda, 31-nji dekabr güni ýurduň sebit merkezlerinde dikilen Baş arçalaryň töwereginde döwlet gözegçiliginde baýramçylyk çäreleri geçirilýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.