Lebabyň dolandyryş merkeziniň durky täzelenen iň iri bazarlarynyň biriniň açylyş dabarasyna uly taýýarlyk görülýärkä, häkimiýetler bu sebitde ozaldan bar bolan köne goş-golamlaryň söwda nokadyny dargadýar.
“Türkmenabadyň durky täzelenen 'Merkezi daýhan' bazarynyň 25-nji dekabrda açylmagyna garaşylýar. Munuň bilen bagly güýçli depginde arassaçylyk we bezeg işleri geçirilýär. Bularyň çäginde ilat arasynda ‘Gök bazar’ diýlip hem atlandyrylýan bu söwda nokadynyň golaýynda öz öý goşlaryny satuwa çykarýan raýatlar hem kowulýar” diýip, bu ýagdaýlara şaýat bolan ýerli ýaşaýjylaryň biri 22-nji dekabrda gürrüň berdi.
Ýurtdaky agyr ykdysady krizisiň arasynda soňky döwür, ýurduň beýleki künjeklerinde hem bolşy ýaly, Türkmenabatda-da ujypsyz nyrha hojalyk harytlaryny, şol sanda mobil telefonlaryny, egin-eşiklerini satuwa çykarýan adamalaryň sany göz-görtele artdy.
“Bu günler Täze ýyl baýramçylygyna nähilidir bolsa bir pul edinmegiň aladasynda bazara harytlaryny çykarýan raýatlar hasam köpeldi” diýip, söhbetdeşimiz nygtady.
Häkimiýetler köçe söwdagärlerine bazaryň golaýyndaky köpriniň aşagynda harytlaryny satmaga rugsat berdiler.
Şol bir wagtda, häkimiýetler resmi ýagdaýda bazardan ýer satyn almadyk bu raýatlar üçin golaýdaky köpriniň aşagynda söwdasyny dowam etdirmeklerine rugsat berdiler.
“Bu köprüden geçýän ulaglaryň çaňy söwdagärleriň we olaryň harytlarynyň üstüne düşýär. Bu sebäpli dem almak hem kyn. Satyjylar başga bir ýere geçjek bolsalar, polisiýa dessine olary kowýar we diňe görkezilen ýerde söwdasyny dowam etdirip biljekdiklerini aýdýar” diýip, bu ýagdaýlaryň jikme-jikleri bilen tanyş söhbetdeşimiz aýtdy.
Ýerli media bu dörän ýagdaý barada maglumat bermeýär. Azatlygyň şäher häkimliginden kommentariýa almak synanyşygy hem netijesiz tamamlandy.
Mundan öň, Azatlyk 'Merkezi daýhan' bazarynyň daşky tarapy we dükanlary ýykylmazdan ozal bu ýerde söwda eden telekeçilere soňy bilen ýeňillikleriň dörediljekdigi baradaky häkimiýetleriň wadalarynyň hem puja çykandygy barada habar beripdi.
Degişli maglumat Maryda birnäçe bazar ýapyldy. Köçe söwdagärlerine gözegçilik güýçlendiTürkmen häkimiýetleri köçe sowdasynyň bikanundygyny, satyjylaryň ýörite rugsatnama we bazarlarda söwda tekjelerini almalydygyny aýdyp, köçede azyk önümleri satýanlara garşy gözegçiliklerini wagtal-wagtal güýçlendirýärler.
Şol bir wagtda, kiçi söwdagärler bazarlarda söwda etmek üçin rugsatnamany almagyň kyndygyny we söwda tekjeleriniň kireýiniň özleriniň maddy mümkinçiliginden aşa gymmatdygyny aýdýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.