Lebap welaýatynyň Türkmenabat şäherinde bir maşgaladan dört agzanyň gazdan zäherlenip ölmegi barada Azatlyk Radiosyna goşmaça maglumatlar gelip gowuşdy. Bu aralykda, betbagtçylygyň yzysüre sebit häkimiýetleri ýaşaýyş jaýlaryndaky gaz enjamlaryny barlamak işlerini güýçlendirdiler.
"Waka 8-nji dekabrdan 9-na geçilen gije şäheriň Dostluk etrapçasynda boldy. Maşgala agzalarynyň biri gaz plitasynyň üstünde çaý gaýnadylýan çäýnegi goýýar. Ol çäýnegi ýatdan çykarýar we uklap galýar. Şondan soňra çäýnekdäki suw gaýnap, gazy öçüripdir. Gaz gijesi bilen beýleki otaglara ýaýrapdyr" diýip, habarçy aýtdy.
Maşgalanyň uly gyzy oýanyp, jaýyň köçä çykýan gapysyna barýar. Ýöne ol gapyny açmanka ýykylyp, şol ýerde aradan çykýar.
Degişli maglumat Türkmenabatda bir maşgaladan dört agza gazdan zäherlenip öldi"9-njy dekabrda öýlän wagty maşgalanyň dört agzasynyň, ýagny ene-atanyň we olaryň iki gyzynyň ölendigi anyklandy. Gyzlaryň biri mekdep okuwçysydy, beýlekisi Seýitnazar Seýdi adyndaky döwlet mugallymçylyk institutynyň ikinji ýyl talybydy. Heläkçilikde maşgalanyň diňe bir agzasy aman galýar. Wakanyň bolan wagty 17 ýaşly oglan sport ýaryşyna gatnaşmak üçin Aşgabada giden eken" diýip, habarçy belledi.
Waka barada ilkinji bolup habar beren "Türkmen.news" neşiri jaýy ýyladýan pejiň gaz üpjünçilik ulgamyndaky basyşyň üýtgemegi zerarly öçüp, soň ýene kadalaşan wagtynda syzyp başlan gazyň uklap ýatan adamlaryň zäherlenmegine sebäp bolmagynyň ähtimaldygyny belläpdi.
Adatça bolşy ýaly heläkçilik we oňa nämäniň sebäp bolandygy barada türkmen häkimiýetleri ýa-da media serişdeleri tarapyndan köpçülige maglumat ýa düşündiriş berilmeýär.
Azatlygyň bu barada şäheriň Polisiýa müdirliginden kommentariýa almak synanyşygy hem häzirlikçe başa barmady.
Ýöne betbagtçylygyň yzysüre, sebit häkimiýetleri ýaşaýyş jaýlaryndaky gaz enjamlaryny barlamak işlerini gaýtadan güýçlendirdiler.
Degişli maglumat Daşoguzda aýazda ýyladyş gaz ulgamlary hatardan çykýar, adamlar üşeýärBu işleriň çäginde etrapçadaky hojalyk jaýlarynyň gaz peçleri, gaz geçiriji turbalary, gaz plitalary, gaz ýyladyş ulgamlary berk barlanýar.
"Etrapçada esasan hojalyk jaýlar bolup, olar gaz peçler bilen ýyladylýar. Gaz edaranyň we ýangyn howpsuzlygy bölümiň işgärleri tüsse çykarýan turbasy ýuka bolan ýaşaýjylardan galyň turba goýmagy berk talap edýärler. Olar öýme-öý aýlanýarlar" diýip, habarçy aýtdy.
Soňky hepdelerde Türkmenistanda sebit üçin adatdan daşary sowuk howa dowam edýärkä, ýurduň demirgazyk we gündogar sebitleriniň käbir ýaşaýjylary gaz we elektrik ulgamynyň yzygiderli kesilmegi bilen ýüzbe-ýüz bolýarlar. Şeýle-de, ýurduň dürli sebitlerinde ýyladyş ulgamlary hatardan çykýar. Ilat ýylynmakda kynçylyk çeýär.
Energiýa serişdelerine baý Türkmenistanyň häkimiýetleri bu ýagdaýlary düýpden agzaman, Özbegistana goşmaça gaz we elektrik toguny satmak barada gepleşik geçirýärler.
Degişli maglumat Mary: Aýazly howada oba ilaty odun ýakyp ýylynýarGadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.