Türkmenistanda geçirilen ekologiýa boýunça giň gerimli okuw sapagyny Ginnesiň rekordlar kitabyna girizmek teklip edilýär diýip, Türkmen döwlet habarlar (TDH) agentligi ýazýar. Bu habar Ginness rekordlar kitabynyň wekilleriniň türkmenlere tälim berjekdigi baradaky maglumatyň, şeýle-de Türkmenistanda ýokary derejede metan gazyny syzdyrýan täze ýerleriň üstüniň açylmagynyň yz ýanyna gabat geldi.
"28-nji oktýabrda gurluşygy güýçli depginde alnyp barylýan Ahal welaýatynyň täze, döwrebap edara ediş merkeziniň golaýynda 'Organiki bakjalyk we onuň ekologiýa goşýan goşandy' atly okuw sapagy geçirildi. Ol açyk asmanyň astynda geçirilen şeýle çäreleriň iň giň gerimlisi boldy. Bu çäräni Ginnesiň rekordlar kitabyna girizmegi teklip etmek meýilleşdirilýär" diýip, resmi metbugat habar berýär.
Maglumatda bu okuw sapagyna oba hojalyk pudagynyň 500-den gowrak hünärmeniniň, şeýle-de Türkmenistana gelen Bütindünýä rekordlary guramak boýunça geňeşçi Aýdyn Türkgüjüniň hem gatnaşandygy bellenýär.
Degişli maglumat Ginnes rekordlar kitabynyň wekilleri türkmenistanlylara tälim bererler. Täze rekordlara garaşmalymy?TDH okuw sapagyna taýýarlyk meselesiniň Türkmenistanyň Milli Geňeşiniň Halk Maslahatynyň başlygy Gurbanguly Berdimuhamedowyň 27-nji oktýabrda Ahal welaýatyna amala aşyran iş saparynyň barşynda ara alnyp maslahatlaşylandygyny hem belledi.
Bu habar, Ginness rekordlar kitabynyň wekilleriniň Ahalda gurulýan täze administratiw merkeziniň 500 hünärmeni üçin bir günlük okuw geçirmegi planlaşdyrýandygy baradaky maglumatyň yz ýanyna gabat geldi.
Ginness Rekordlar kitabynyň wekilleriniň türkmenlere tälim berjekdigi barada Ahalda täze merkez gurmak boýunça döwlet komitetiniň başlygy Derýageldi Orazow bu ýere iş sapary wagtynda Gurbanguly Berdimuhamedowa hasabat beripdir. Bu barada 16-njy oktýabrda Arzuw.news neşiri habar berdi. Şonda bu okuw sapagyna türkmen hünärmenleriniň, alymlarynyň we uniwersitet okuwçylarynyň gatnaşjakdygy hem aýdyldy.
Ýöne TDH-nyň soňky habarynda "ekologiýa sapagyny" Ginnesiň rekordlar kitabyna girizmegiň teklip edilýändigi aýdylsa-da, sapakda kitabyň wekilleriniň türkmenlere tälim berendigi ýa bermändigi barada hiç zat aýdylmaýar.
Galyberse-de, "ekologiýa sapagyny" Ginnesiň rekordlar kitabyna girizmegiň teklip edilmegi, howa goýberilýän zyýanly gazlara barha kän jogapkär bolmakda tankytlanýan Türkmenistanda ýokary derejede metan gazyny syzdyrýan täze 12 sany ýeriň üstüniň açylan mahalyna gabat geldi.
Degişli maglumat NASA abzaly Türkmenistanda ýokary derejede metan gazyny syzdyrýan 12 ýeriň üstüni açdyNASA-nyň, ABŞ-nyň komos agentliginiň 25-nji oktýabrda ýaýradan maglumatyna görä, alymlar Türkmenistanyň Hazaryň gündogarynda ýerleşýän nebit-gaz infrastrukturasyndaky 12 ýerden asmana göterilýän tüssäniň şleýfiniň her sagatda 50 müň 400 kilogram metany howa goýberýändigini çaklaýarlar.
Elektrik stansiýalarynda ulanylýan tebigy gazyň esasy düzüm bölegi bolan metan, adam tarapyndan döredilen parnik zyňyndylarynyň bir bölegini düzýär. Ýöne ol atmosfera akdyrylanda onuň ýylylyk täsiri kömürturşy gazyndan 80 esse ýokary bolýar.
Tebigaty goramak üçin iňňän uly iş bitirilýändigini tekrarlaýan türkmen häkimiýetleri geçen hepde geçirilen "ekologiýa sapagynda" ýurduň käbir nebit we gaz desgalarynyň dünýäde howanyň özgermegine täsir ýetirýändigi baradaky maglumatlar barada aç-açan çykyş etmeýärler.
Ýöne resmi metbugatyň "ekologiýa sapagy" baradaky habarynda "daşky gurşawa aýawly garamak Türkmenistanda amala aşyrylýan ähli düzümleýin taslamalara bildirilýän esasy talapdyr" diýilýär.
Ginness rekordlar kitabynyň wekilleri Türkmenistanyň häkimiýetleri bilen uzak ýyllar bäri hyzmatdaşlyk edip gelýärler. Soňky 20 ýyla golaý döwürde Ginness rekordlar kitaby ýurtda, şol sanda öňki prezident Gurbanguly Berdimuhamedowyň gatnaşmagyndaky onlarça rekordy hasaba aldy.
Degişli maglumat Türkmenler Täze ýylyň şygaryny wasp edip, täze rekord goýmaga taýýarlanýarGadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň gizlinligini doly kepillendirýär.