Gazagystanyň içeri işler ministri Marat Ahmetžanow Russiýanyň prezidenti Wladimir Putiniň 21-nji sentýabrda, Moskwanyň Ukrainada alyp barýan urşunyň arasynda yglan eden bölekleýin mobilizasiýasyndan bäri ýurda 200,000 rus raýatynyň girendigini aýtdy.
Ahmetžanow 4-nji oktýabrda gürrüňi edilýän döwürde Gazagystany 147,000 rus raýatynyň terk edendigini aýtdy. Ol Gazagystanyň territoriýasyndan geçen ruslaryň nirä barýandygyny aýtmady.
Gazak häkimiýetleri geçen hepde soňky günlerde Gazagystana giren onlarça müň rusuň goňşy Özbegistana we Gyrgyzystana geçendigini aýtdy.
Ahmetžanow hepdäniň aýayndan bäri Gazagystana gelip girýän ruslaryň sanynyň azalyp başlandygyny aýtdy. Habar beriş serişdeleri biraz öň Russiýanyň häkimiýetleriniň Russiýa-Gazagystan serhet nokatlarynda göçme gulluga çagyryş stansiýalaryny ýerleşdirendigini habar berdiler.
Ahmetžanow geçen hepde Gazagystanyň rus raýatlaryny diňe halkara derejesinde gözlenýän adamlaryň sanawlaryna resmi taýdan girizilen halatynda Russiýa ekstradisiýa etjekdigini aýtdy.
Gazak prezidenti Kasym-Žomart Tokaýew biraz öň, Russiýada başlanan bölekleýin mobilizasiýadan bäri Gazagystana gelýän ruslaryň, hususan-da erkekleriň sanynyň birden aşa köpelmegi barada rus hökümeti bilen gepleşik geçirmekçi bolýandygyny aýtdy.
Şu aralykda Russiýa ýurtda ätiýaçdaky harby gullukçylaryň 200 müň sanysynyň eýýäm, 10 gün içinde çagyrylandygyny aýtdy. Putiniň yglan eden bölekleýin harby mobilizasiýasynda 300 müň adamyň harby gulluga çagyryljakdygy aýdyldy.