Türkmenistan ýurduň çäklerinde hemişelik ýaşaýan hem-de 26 milletiniň wekilleri bolup durýan 1 müň 530 adama raýatlyk berdi. Döwlet mediasynyň maglumatyna görä, täze pasportlary gowşurmak çäresi Döwlet migrasiýa gullugynda geçirilipdir.
Mundan başga-da, 315 adama, ýagny dünýäniň 9 döwletiniň raýatlaryna we 23 milletiň wekillerine Türkmenistanda ýaşamak üçin ygtyýarnamalary bermek bellenildi.
Ýarym-resmi türkmen neşirlerine görä, häzire çenli Türkmenistan ýurduň çäginde ýaşaýan we raýatlygy bolmadyklaryň 28 müň 167 sanysyna türkmen pasportyny beripdir. Şeýle-de, 4 müň 438 daşary ýurtla we raýatlygy bolmadyklara ýurduň çäginde ýaşamaga ygtyýarnama berlipdir.
Türkmenistanyň kanunlary goşa raýatlygy kabul etmeýär.