2018-2022-nji ýyllarda Türkmenistanda 18 ýaşa çenli aralykdaky maýyp çagalaryň sany 22,4 göterim artdy diýip, “Turkmen News” neşiri Türkmenistanyň BMG-niň aýal-gyzlara garşy kemsitmeleri ýok etmek baradaky komitetine iberen altynjy döwürleýin hasabatyna salgylanyp habar berýär.
Resminamada aýdylmagyna görä, 2018-nji ýylda Türkmenistanda hasaba alnan maýyp çagalaryň sany 19,6 müň bolan bolsa, 2022-nji ýylda hasaba alnan maýyp çagalaryň sany 24 müň boldy. Ýurtdaky maýyp çagalaryň sanynyň köpelmeginiň sebäpleri aýdylmaýar diýip, habarda bellenýär.
Şol bir wagtda, hasabatda aýdylmagyna görä, bu döwürde maýyplaryň umumy sany 18,7% ýokarlanyp, 153,1 müňden 179,6 müňe ýetdi.
Maýyp çagalaryň arasynda gyzlara garanyňda oglanlaryň sanynyň biraz köpdügi, olara berilýän kömek pulunyň mukdarynyň soňky ýyllarda köpeldilendigi, ýöne barybir az bolup galýandygy aýdylýar.
Resmi taýdan tassyklanmadyk maglumatlara görä, lukmanlar maýyp bolup dogmak ähtimallygyny duýduransoň, soňky ýyllarda ýurtda göwresindäki çagasyny aýyrdýan aýallaryň sany köpelýär.