Türkmen häkimiýetleri sentýabryň ahyryna çenli Türkmenistandan Russiýa gitmedik talyplary harby gulluga alyp başlarlar. Bu barada garaşsyz neşir Turkmen.news habar berýär. Bu maglumat türkmen prezidentiniň Türkmenistanda harby gulluga çagyryşy wagtlaýyn yza süýşürmegi kanunlaşdyrýan täze kanuna gol goýandan bir hepde soňa gabat geldi.
Turkmen.news neşiriniň maglumatyna görä, rus ýokary okuw jaýlaryna okuwa kabul edilen talyplar 1-nji oktýabrdan öň ýurtdan gidip ýetişmese, onda olaryň harby gullugy yza süýşürmek baradaky resminamalary öz güýjüni ýitirer.
Neşiriň 7-nji sentýabrda çap eden habaryna görä, munuň bilen bagly, şu günler Russiýanyň Aşgabatdaky ilçihanasynyň konsulhana bölüminiň öňünde talyp wizalaryny almak isleýän raýatlaryň uzyn nobatlary emele geldi.
Degişli maglumat Daşary ýurtlardan gelen türkmen talyplary karantinden soň, dessine harby gulluga iberilýär"Konsulhananyň golaýynda nobatçylyk çekýän türkmen polisiýa işgärleri binanyň içine girmek isleýänlerden para alýarlar. 2000-3000 manat tölänler dessine diýen ýaly konsulhana girip bilýärler. Pul bermedik raýatlar käte nobatlarda hepdeläp garaşmaly bolýarlar" diýip, neşir berilýän paranyň wiza almagy kepillendirmeýändigini, diňe binanyň içine girmäge mümkinçilik döredýändigini hem belleýär.
Neşire görä, harby gullugy yza süýşürmek baradaky resminamanyň haýsy düzgünlere esaslanyp 1-nji oktýabrda öz güýjüni ýitirjekdigi nämälim bolmagynda galýar.
Garaşsyz neşir käbir talyplaryň wizasynyň we uçar biletleriniň bardygyna garamazdan, uçara goýberilmeýändigini hem habar berýär.
"Käte [migrasiýa gullugynyň işgärleri] munuň sebäbini talyplaryň okuwa kabul edilen uniwersitetleriniň türkmen häkimiýetleriniň daşary ýurt ýokary okuw jaýlary barada tassyklan sanawyna goşulmandygy bilen delillendirýärler, käte-de rus ÝOJ-laryndan alnan resminalarda poçta möhüriniň ýokdugyny bahana edýärler" diýlip, habarda aýdylýar.
Azatlyga bu maglumatlary öz ýurt içindäki habarçylaryna we çeşmelerine tassyklatmak ýa-da inkär etdirmek häzirlikçe başartmady. Şeýle-de, bu düzgünleriň beýleki ýurtlarda okamaga gidýän talyplara degişlimi ýa däldigini hem anyklap bolmady. Bu barada resmi metbugatda hem maglumat göze ilmeýär.
Ýöne bu maglumat Türkmenistanda harby gulluga çagyryşy wagtlaýyn yza süýşürmegiň kanunlaşdyrylmagyndan bir hepde soňa gabat geldi.
Hökümetçi "Turkmenportal" neşiriniň habaryna görä, täze düzgün "Ýaşlar barada döwlet syýasaty hakynda" Türkmenistanyň kanunynyň rejelenen görnüşinde göz öňünde tutulýar. Türkmen prezidenti Serdar Berdimuhamedow täze kanuna Magtymguly adyndaky Ýaşlar guramasynyň VII gurultaýynyň çäklerinde 1-nji sentýabrda gol çekdi.
"Ýaşlarda okuwyň üznüksizligini gazanmak we olary hünäre ugrukdyrmak maksady bilen, umumybilim edaralaryny tamamlan ýaş oglanlaryň ýokary we orta hünär okuw mekdepleriniň giriş synaglaryna gatnaşmagy üçin bir gezek mümkinçilik döretmek şerti bilen, Türkmenistanda mundan beýläk 18 ýaşyny dolduran ýigitleriň harby gulluga çagyryş möhleti wagtlaýyn yza süýşüriler" diýip, hökümetçi neşir ýazýar.
Degişli maglumat Türkmen esgerleriniň goşun gullugyny soňlamagy näçä durýär?Ýatlatsak, kanuna bu üýtgetmeleri girizmek barada Türkmenistanyň Halk Maslahatynyň başlygy Gurbanguly Berdimuhamedow 14-nji iýunda Aşgabadyň Maslahatlar köşgünde ýaşlar bilen geçiren maslahatynda teklip edipdi.
Bu teklip we onuň kanunlaşdyrylmagy Azatlygyň daşary ýurtlarda ýokary okuwy tamamlan ýigitleriň ýurda dolanandan soňra, karantinden dessine harby gulluga çagyrylýandygy, şuňa meňzeş tejribäniň ýurduň orta mekdeplerinde we ýokary okuw jaýlarynda hem gaýtalanýandygy baradaky habarlarynyň yz ýanyna gabat geldi.
Habarçylarymyz, ýerli harby bölümleriň işgärlerine salgylanyp, ýaşlaryň mekdepden ýa aeroportdan dessine harby gulluga alnyp gidilmeginiň sebäplerini ýurduň harby pudagynda esger ýetmezçiligi bilen düşündirýärler.
Türkmenistanda 18 ýaşyna ýeten uçurymlary mekdeplerden ýa-da aeroportdan göni goşun gullugyna almak tejribesi soňky birnäçe ýyl bäri dowam edýär.
Türkmenistanda raýatlary harby gulluga çagyrmak çäreleri ýurduň prezidentiniň namalary esasynda ýylda iki gezek - 1-nji aprelden 30-njy iýuna çenli hem-de 1-nji oktýabrdan 31-nji dekabra çenli aralykda geçirilýär.
Degişli maglumat Azatlygyň habaryndan soň, orta mekdebi tamamlaýan oglanlaryň harby gullugy wagtlaýyn yza süýşürilerGadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.