Ukrainada alty aý dowam edýän uruşda Russiýa 900-den gowrak saýlama harby hünärmenini, GRU-nyň, Baş aňtaw uprawleniýsiniň ýörite güýçlerini, deňiz güýçlerini, desantçylary, harby uçarmanlary ýitirdi.
Bu hünärmenleriň taýýarlanmagy üçin ençeme ýyl we millionlarça dollar harçlandy diýip, BBC-niň Rus gullugy habar berdi.
Žurnalistler BBC-niň “Mediazona” web sahypasy we meýletinçiler topary bilen ýogalandygy tassyklanan esgerler barada bilelikde alyp barýan sanawyny seljerdiler.
Hususan-da, açyk maglumatlara görä, olar GRU-yň ýörite güýçleriniň 151 esgeriniň, Rosgwardiýanyň 245 işgäriniň ölümini anyklamagy başardylar. Rosgwardiýada we GRU-nyň ýörite güýçlerinde öldürilenleriň her dördünjisi (22%) diýen ýaly ofiser eken.
Çap edilen nekrologlaryň derňewi Ukraina çozulanda iň agyr ýitgini ýörite güýçleriň 22-nji gwardiýa brigadasynyň çekendigini görkezdi.
Bu brigadada azyndan 30 harby gullukçy, şol sanda dört ofiser, rota komandirleri öldürildi. Ýogsa bu brigadada diňe dört sany ýörite güýç rotasy bardy.