Russiýanyň Ukrainanyň gündogaryndaky we günortasyndaky oba-şäherleri topa tutmagyny dowam etdirmegi bilen, ukrain güýçleri sebitde başlan garşylykly hüjümlerini güýçlendirip, ýurduň günortasynda ýerleşýän rus harby bazalarynyň azyndan üç sanysyna zarba urdy. Şu aralykda, rus we ukrain harbylarynyň Stambulda, Russiýa tarapyndan petiklenen Gara deňiz portlaryny gaýtadan açmak we arasy kesilen däne eksportyny dikeldip, millionlarça adama abanan açlyk howpuny azaltmak maksady bilen geçirilýän gepleşikleriniň çäginde, diplomatiki frontda belli bir öňegidişligiň gazanylandygy habar berilýär.
Ukrainanyň Günorta operatiw serkerdeligi 14-nji iýulda öz güýçleriniň şu hepde günortada, rus gözegçiliginde galýan Herson sebitinde ýerleşýän Nowa Kahowka eden ikinji hüjüminde iki harby barlag nokadyna we bir gonuş meýdançasyna zarba urandygyny aýtdy. Bu zarbalar esasynda 13 sany rus "basybalyjysynyň" öldürilendigi aýdylýar.
Ukraina bu zarbalary urmazyndan öň, iki gün ozal öz güýçleriniň Nowa Kahowkadaky rus ok-ýarag ammaryna hüjüm edip, 52 esgeri öldürendigini aýtdy. Şäheriň Moskwa tarapyndan bellenen häkimiýetleri bu hüjümde azyndan ýedi adamyň, diňe parahat ýaşaýjylaryň ölendigini aýtdylar.
Ukrainanyň günortadaky hüjümleri Kiýewiň elden giderilen ýerleri yzyna almak üçin, rus goşunlarynyň bar ünsüni gündogardaky Donetsk we Luhansk sebitlerinden durýan Donbasy ele geçirmäge gönükdiren wagtynda, uly hüjüme taýýarlanýandygyny we bu sebitde ýüzlerçe müň esger toplaýandygyny yglan etmeginiň yz ýanyna gabat geldi.
Söweş meýdanyndaky ýagdaýlar barada uruşýan taraplaryň aýdýan, öňe sürýän zatlaryny hemişe garaşsyz ýagdaýda tassyklamak başartmaýar.
Ukrainanyň Donetsk sebit harby administrasiýasynyň başlygy Pawlo Kirilenko Donetsk sebitine atylan top oklary netijesinde parahat ilatdan üç adamyň ölendigini, bäş adamyň ýaralanandygyny, Çasow Ýar şäherçesinde bolsa iki adamyň ölendigini aýtdy.
Takmynan 12,000 ilaty bolan Çasow Ýarda, rus güýçleriniň 9-njy iýulda bir ýaşaýyş jaýyna uran raketa zarbasynda 48 adam wepat boldy. Ukrain resmileri bu zarbany “uruş jenaýaty” diýip atlandyrdylar.
Kirilenko rus güýçleriniň Slowýanskdaky granit zawodyna-da zarba urandygyny aýtdy. Bu ýerde ýaralanan bolmady, ýöne weýrançylyk uly boldy diýip, ol Telegramda bombalanan zawodyň wideolaryny paýlaşanda aýtdy.
Britan Goranmak ministrligi 13-nji iýulda geçiren gündelik metbugat ýygnagynda rus goşunlarynyň Siwerski we Dolina şäherlerine ýakynlaşýandygyny, Slowýansk we Kramatorsk şäher etraplarynyň bolsa, “operasiýanyň häzirki tapgyrynyň esasy maksatlary” bolup durýandygyny aýtdy.
Ukrain goşunynyň baş ştaby 14-nji iýulda Harkowyň golaýyndaky Kurulka şäherini basyp almaga synanyşan rus güýçleriniň yza çekilmäge mejbur edilendigini aýtdy. Bu şäher Ukrainanyň demirgazyk-gündogarynda, emma Donbasyň çäginden daşarda ýerleşýär.
Emma muňa garamazdan, ukrain harbylary rus goşunlarynyň Ukrainanyň günortasyndaky Kamýanka obasyna tarap eden hüjümlerinde "bölekleýin üstünlik" gazanandygyny aýtdylar.
Mikolaýewiň şäher häkimi Oleksandr Senkewiç Telegramda 476 müň ilatly günorta şähere urlan zarbadan soň, halas edijileriň we adatdan daşary ýagdaý gullugynyň işgärleriniň weýrançylyk nokatlarynda işleýändigini aýtdy. Bu şäher Russiýanyň basyp alan Herson portundan 60 km demirgazyk-günbatarda ýerleşýär.
Wideo subutnamalaryna we ukrain şäherlerindäki göze dürtülip duran weýrançylyklara garamazdan, Russiýa bilkastdan parahat ilata hüjüm edendigini inkär edýär.
Şu aralykda, Russiýa bilen Ukrainanyň arasynda barýan parahatçylyk gepleşikleriniň näbelli bir möhlete çenli togtadylan wagtynda, iki ýurduň harby wekilleri Stambulda duşuşyp, häzirki wagtda Russiýanyň gözegçiliginde galýan ukrain portlaryndan bugdaý we galla ýüklerini ibermegi gaýtadan ýola goýmak barada gepleşik geçirdi.
Stambuldaky duşuşyga gatnaşanlaryň aýtmaklaryna görä, Türkiýe we BMG tarapyndan araçylyk edilen gepleşiklerde bu maslahaty dowam etdirmek, indiki hepde hem duşuşmak üçin ýeterlik ilerleme gazanyldy.
Türkiýäniň goranmak ministri Hulusi Akar bu gepleşiklerden soň çap eden beýanatynda iki tarapyň Gara deňizdäki “geçiş ugurlarynyň howpsuzlygyny üpjün etmek üçin” gürrüňi edilýän portlara we suw ýollaryna "bilelikde gözegçilik" etmek barada ylalaşyga gelendiklerini aýtdy.
Türkiýede gelýän hepde boljak duşuşykdan soň "ähli jikme-jiklikler ýene bir gezek gözden geçiriler we eden işlerimize gol çekiler" diýip, Akar aýtdy.