Aşgabadyň käbir keselhanalarynda barýanlardan lukmançylyk maskalaryny dakynmak ýene-de talap edilip başlandy. Saglyk işgärleriniň aýtmagyna görä, bu talap koronawirusyň ýaýramagy bilen baglanyşykly girizlipdir. Türkmen hökümeti ýurtda COVID-19 barlygyny henizem resmi taýdan ykrar etmedi. Azatlyk Radiosynyň habarçylary soňky ýagdaýlar barada Türkmenistandan habar berýärler.
"Şu gün men klinikalaryň birinde boldum, maska režimini girizdiler" -diýip, Azatlygyň habarçysy 8-nji iýulda habar berdi we bir hepde öň hassahananyň kabul ediş otagynda we hemme ýerinde barýanlara maskasyz ýöremäge rugsat berilendigini belledi.
"Diňe isleg boýunça maska dakynmalydy, indi bolsa kabul ediş otaga maskasyz goýberilmedi we ol ýerde hemmeler maskalydy" - diýip habarçy aýtdy.
Türkmenistanyň hökümeti lukmançylyk maskalaryny dakynmak düzgünini tomsuň başynda ýatyrypdy we öz kararyny dünýädäki epidemiologiki ýagdaýyň gowulaşmagy bilen düşündiripdi.
Degişli maglumat Mary we Lebap: Maska talaby gowşaýar, syýahat çäklendirmeleri bökdeýärHabarçy bilen söhbetdeş bolan lukmanyň sözlerine görä, maska dakynmak talabynyň janlanmagy koronawirus bilen täze kesellänleriň anyklanmagy bilen baglanyşyklydyr, koronawirus daşary ýurtlardan gelenlerde tapylypdyr we indi maska režiminiň girizilmegi we beýleki çäklendirmeleriň ýola goýulmagy mümkin.
Koronawirus keseliniň anyklanmagy baradaky habarlar resmi taýdan tassyklanmady.
Azatlygyň Aşgabatdaky habarçysynyň aýtmagyna görä, paýtagtyň medisina edaralarynda ilata täze kesel tolkunynyň başlanmagy barada birnäçe aý ozal duýduryş edilipdir. Emma bu tassyklanmandyr.
Ondan öň Azatlygyň habarçylary Türkmenistanyň günbataryndaky Balkan welaýatynda koronawirus keseliniň tazeden tapylandygyny habar berdiler.
16-njy iýunda ýerli habarçy sebit häkimiýetleriniň ilat arasynda test geçirmek işini güýçlendirendigini habar berdi. Hususan-da, synag Türkmenbaşa, Balkan welaýatyna gelip, beýleki sebitlere gatnaýan adamlaryň we harby gullukçylaryň arasynda geçirilipdir.
"Düýn, türkmenbaşy şäherine, Ahal, Balkan welaýatlaryna içerki hereket edýan raýatlar we harby gullugy tamamlan esgerleriň bir tapgyry COVID-19 teslerinden geçdi. Koronawirusyň bardygy anyklanyp, raýatlaryň we esgerleriň ençemesi karantine alyndy" diýip, Azatlygyň ýerli çeşmesi 16-njy iýunda habar berdi.
Ýurduň häkimiýetleri COVID-19 ýurtda hasaba alynmandy diýip aýdyp gelýär. Bu aralykda, ýurduň Saglygy saklaýyş ministrligi Azatlyk Radiosynyň çeşmeleriniň ýurtda koronawirusdan 25,000-den gowrak ölen adamyň hasaba alnandygy baradaky maglumatlaryny ne tassyklady, ne-de inkär etdi.
Degişli maglumat Maska dakynmalymy ýa-da ýok? Prezident bu soragyň jogabynyň aýdyňlaşdyrylmagyny tabşyrdyTürkmenistanda koronawirus alamatly keseliň ýaýramagy 2020-nji ýylyň ýazynyň ahyryndan bäri dowam edýär. Şol döwürden başlap ýüze çykan görlüp-eşidilmedik hassalyk we ölüm derejesi baradaky habarlaryň fonunda ýurduň keselhanalary hassalaryň akymyna, gonamçylyklar bolsa ölenleri jaýlamak üçin dörän talaplara ençeme gezek döz gelip bilmedi.
Koronawirus pandemiýasy wagtynda Türkmenistan ilatyň ýurduň içinde hereket etmek mümkinçiligini ep-esli çäklendirdi, uçar gatnawyny ýatyrdy, koronawirusa garşy waksinany hökmany etdi we maska dakynmak we sosial aralygy saklamak talaplaryny girizdi. Ýurtda ilatyň ep-esli bölegini birnäçe aýlap eklençden mahrum eden berk çäklendirmeler üç gezek girizildi.
Iýun aýynda ýurtda ilata koronawirusa garşy waksinanyň dördünji dozasy edilip başlandy. Türkmenistanyň hökümeti ilatyň 90% -den gowragyna koronawirusa garşy waksina edilendigini öňe sürýär.
Degişli maglumat 'Ýok' diýilýän koronawirusa garşy sanjym. Türkmenistan öz ilatyna COVID-19-a garşy dördünji sanjymy edýärGadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.