Yslamabadyň eteginde üç hepdä golaý saklanan protestçi lagerleri aýrylmazyndan öň maşynlary otlap, Pakistanyň yslamçy partiýalarynyň aktiwistleri tapgyr ikinji gün howpsuzlyk güýçleri bilen çaknyşdylar.
26-njy noýabrdaky zorlukly wakalar berk liniýaly yslamçylar bilen Pakistanyň howpsuzlyk güýçleriniň arasynda bolan çaknyşykda azyndan alty adam ölüp, 200-den gowrak adam (köpüsi polisiýa ofiseri) ýaraly bolandan bir gün soň boldy.
Bu zorluklar Pakistanyň Içeri ministrliginiň 25-nji noýabr güni giçlik, şäherde “kanunçylyga we düzgün-tertibe gözegçilik” üçin ýurduň goşunlaryndan “ýeterlik möçberde esger’ ýerleşdirmegi buýurmagyna getirdi.
Goşundan getirilen esgerler ynjyk desgalaryň, diplomatik howlularyň, şeýle-de sud, parlament, prezident we premýer-ministr, Daşary işler ministrligi binalarynyň howpsyzlygyny üpjün etmelidi.
Emma 26-njy noýabr güni irden töweregi gabalan Faýzabad etrabyndaky protest lageriniň daşyny polisiýa we ýarym harby güýçler alan hem bolsa, ol ýerde goşun esgerleri bolmady.
2 müň çemesi protestçi 6-njy noýabrdan bäri, Yslamabada gelýän esasy ýoly baglap, bu ýerde protest lagerini döretdi.
26-njy noýabr güni irden protest ýygnanyşygynyň has ulalandygy, şol sanda oňa “Tehreek-e Labaik Ya Rasool Allah” partiýasynyň hem birnäçe müň agzasynyň goşulandygy belli boldy. Protestler başga şäherlere, şol sanda Karäçä hem ýaýrady.