Türkmen görnüşleri - 17-nji hepde
Aşgabadyň Çoganly daçalyklarynyň ýaşaýjysy - ene we gyz. Çoganly daçalyklarynda ýaşaýyş jaýlary ýykmak ýa-da söküp aýyrmak işleri dowam edýär. Bu sebitiň ýaşaýjylarynyň käbirleri ýykylan ýa-da ýykyljak jaýlaryň deregine döwlet tarapyndan hiç hili kompensasiýanyň berilmeýändigini aýdýarlar.
Aşgabadyň kommunal hojalygynyň işgärleri Magtymguly hem-de Andalyp köçesiniň çatrygynda ýol hereketiniň pyýadalar üçin geçelgesini abatlaýarlar. Bu çäräniň 2 sagat çemesi wagtyň dowamynda amala aşyrylýandygy aýdylýar.
Aşgabadyň Şor daçalygyndaky zir-zibiller. 18-nji aprelde Aşgabadyň etegindäki Şor daçalarynda ençeme ýüz adamynyň häkimiýetler tarapyndan jaýlarynyň ýumruljakdygy baradaky planlara garşy protest çäresini geçirendigi barada Azatlyk Radiosynyň redaksiýasyna resmi taýdan tassyklanmadyk maglumatlar gelip gowuşdy. Bu sebitde jemi 3 müň çemesi hojalygyň ýaşaýandygy aýdylýar.
Şor daçalygynda satuwa goýlan daça. Bu sebitiň ýaşaýjylaryna 25-nji maýa çenli öz daçalaryny ýumurmaklygyň ýa-da söküp aýyrmaklygyň tabşyrylandygyny, bu territoriýanyň käbir ýaşaýjylary belleýärler.
Aşgabadyň awtobus duralgasynda awtobusa garaşyp duran türkmen talyby.
Aşgabadyň käbir awtobus duralgalarynda howanyň temperaturasy 45 gradusy görkezýär. Şol bir wagtyň özünde Türkmenistanyň resmi websaýtynda paýtagt Aşgabatda howanyň temperaturasynyň ortaça 24 gradusdygy habar berilýär.
Aşgabadyň Çoganly daçalygynda ýykylan ýa-da sökülip aýrylan jaýlardan galan harabalyklar. Takmynan 13 müň daça uçastokly bu sebitiň käbir territoriýalarynda jaýlary ýykmak ýa-da söküp aýyrmak çäresiniň dowam edýändigi habar berilýär.
Aşgabadyň Oguzhan köçesiniň ugrundaky bildiriş tagtasyna işçiler reklama bildirişini asýarlar.