Aşgabatda Eýranyň medeni günleriniň açylyşy boldy

Sişenbe güni Aşgabatda Eýran Yslam Respublikasynyň Türkmenistandaky medeni günleriniň açylyş dabarasy boldy.

Bu dabara Türkmenistanyň we Eýranyň ýokary derejeli resmileri, şol sanda Eýranyň wise-prezidenti Hamid Begaýi hem gatnaşdy.

Sişenbe güni bu dabaranyň gurnalan ýeri bolan Türkmenistanyň Döwlet çeperçilik akademiýasynyň sergiler zalynda Eýranyň çeperçilik we el hünärleri boýunça sungat işleriniň sergisi-de açyldy.

Mundan daşary, düýn Aşgabatdaky «Watan» kino-konsert merkezinde Eýranyň milli folklor toparlarynyň çykyşlary-da görkezildi.

Eýranyň Türkmenistandaky medeni günleriniň dowamynda eýranly kino režisýorlarynyň filmleriniň hem görkeziljekdigi habar berilýär.

Eýran Yslam Respublikasynyň Türkmenistandaky medeni günleri 11-nji fewrala çenli dowam eder.