Lebap welaýatynda keselhanalarda, köpçüligiň köp barýan beýleki edara jaýlarynda maska dakynmak talap edilýär. Munuň sebäbi düşündirilmeýär, ýurtda haýsy-da bolsa bir keselçilik barada resmi habar hem berilmeýär.
Maska dakynmak talabynyň sebäplerini Azatlyk Radiosyna türkmenabatly lukmanlar düşündirdi. Olaryň sözlerine görä, bu talap güýçli depginde ýaýraýan dümew keselleriniň öňüni almak tagallalary bilen bagly.
“Poliklinikalar [şäher saglyk öýleri], dermanhanalar we keselhanalar adamlardan doly. Her maşgalada gripe çalymdaş kesel bilen hassa bolan adam bar” diýip, Türkmenabadyň saglyk öýleriniň birinde işleýän maşgala lukmany anonimlik şertinde gürrüň berdi.
Dümewe meňzeş dem alyş keseliniň ýaýraýandygyny Lebap welaýatynyň köpugurly hassahanasynyň, şäher saglyk öýleriniň we dermanhanalarynyň işgärleri tassykladylar.
13-nji ýanwarda Azatlyk Radiosy bilen söhbetdeş bolan ençeme lebaply saglyk işgäri sebit ýaşaýjylarynyň arasynda grip keseline çalymdaş hassalyk bilen keselleýän adamlarynyň sanynyň gün-günden artýandygyny gürrüň berdiler.
“Şu günüň dowamynda meniň garamagymdaky ýaşaýjylardan birmeňzeş gripiň simptomlary bolan 12 adam geldi. Olaryň ählisi-de erkek adamlar. Laboratoriýamyz hem diňe sagat 10:00-a çenli degişli analizleri alýar, şu sebäpli, biz adaty grip keselini bejerýän dermanlary içmegi maslahat berýäris. Emma dermanlar köplenç kömek edenok” diýip, lukman aýdýar.
Welaýatyň köpugurly hassahanasynyň saglyk işgäri hassalaryň sanynyň duýdansyz artandygyny we keselhanalarda hassalar üçin boş ýerleriň ýokdugyny aýdýar.
“Düýn registraturanyň öňünde grip simptomy bilen hassa bolan göwreli aýal bardy. Registratura ony hasaba aldy, emma: ‘5 günden soň geliň, ýer ýok’ diýip, öýüne ugratmaly boldy. Hassa öňem köpdi, indi has-da köpelýär” diýip, lukman gürrüň berýär.
Türkmenistanyň Saglyk ministrliginiň websaýtynda dümew keselleriniň ýaýramagy we öňüni alyş çäreler barada maglumat ýok. Şeýle-de, umuman keselçilige degişli resmi sanlar we statistika görkezilmeýär.
Maglumat boşlugy we saglyk resmileri tarapyndan habar berilmezligi adamlarda howatyrlanma döredýär.
Näsaglan sebit ýaşaýjylary bu keselçilik barada ýerli habar beriş serişdelerinde kelam agyz sözüň aýdylmaýan wagtynda dermanhanalarda we saglyk edaralarynda ähli adamlaryň medisina maskasyny dakynmaga ündelmeginiň dowul döredýändigini belleýärler.
“Saglyk ministrliginiň sebit bölüminiň adyndan SMS ýollanmaýar ýa-da ýerli gazetde bu barada hiç hili gürrüň edilmeýär. Maňa diňe maşgala lukmanym keseliň barlygyny duýdurdy” diýip, şäher ýaşaýjysy aýdýar.
Türkmenistanda jemgyýetçilik ýerlerinde maska dakynmak tejribesi COVID-19 döwründe başlandy. Üç ýyldan gowrak wagtlap dowam eden global pandemiýasynyň dowamynda koronawirusyň ýurduň giňişliginde düýpden bolmandygyny öňe süren türkmen hökümeti maska dakynmak we hökmany waksinany etdirmek düzgünlerini berk ýöredipdi.
Pandemiýanyň 2023-nji ýylyň maý aýynda tamamlanmagyna garamazdan, Türkmenistanda koronawirus testini etmek talaby saklanýar we ýurda barýan ýolagçylardan serhetde test üçin töleg alynýar.
Şondan bäri ýurtda dürli dümew infeksiýalarynyň, şol sanda koronawirusyň ýüze çykandygy wagtal-wagtal belli boldy. 2024-nji ýylyň tomsunda Türkmenistanda ýaýran wirus zerarly hassalaryň ys we tagam duýmaýandygy habar berlipdi.
Türkmenistanda keselleriň epidemiýasynyň başlanan wagtyna her gezek ilata ýerli lukmanlar tarapyndan ýerlerde habar berilýär. Şeýle duýduryşlaryň biri 2023-nji güýzünde edildi, ilata ýurtda koronawirusa meňzeş keseliň ýaýraýandygy mälim edildi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum