Türkmen häkimiýetleri on ýyldan gowrak wagt bäri azatlykdan mahrum edilen adam hukuklaryny goraýjy aktiwist Mansur Mingelowy boşatmak meselesine sereder. Bu barada Türkmenistanyň Daşary işler ministrliginiň wekili BMG-nyň jyns taýdan kemsitmeleri ýok etmek baradaky komitetiniň Türkmenistandaky ýagdaýa bagyşlanan maslahatynda aýtdy.
Türkmenistanda ýaşaýan buluçlaryň hukuklary ugrunda göreş alyp baran Mansur Mingelow 2012-nji ýylda ençeme aýyplama esasynda 22 ýyllyk azatlykdan mahrum edildi. Mingelowa kesilen işi onuň özi we tarapdarlary syýasy matlaply diýip atlandyrdylar.
Garaşsyz “Turkmen.news” neşiriniň habaryna görä, Mingelowyň ykbaly 22-nji awgustda BMG-nyň jyns taýdan kemsitmeleri ýok etmek boýunça komitetiniň maslahatynda ýene bir gezek gozgalypdyr.
"BMG wekilleri Mingelowyň boşadylmagy meselesiniň Adam hukuklary komiteti tarapyndan 2023-nji ýylyň mart aýynda gozgalandygyny ýatladylar. Muňa jogap hökmünde Türkmenistanyň Daşary işler ministriniň orunbasary Wepa Hajiýew bu meselä seredilýändigini we karar barada komitete habar beriljekdigini aýtdy" - diýlip maglumatda bellenýär.
Şeýle-de, "Turkmen.news" neşiri ministriniň orunbasary Hajiýewiň Mingelow barada aýdanynda onuň adam hukuklary boýunça aktiwist statusyny ýaňsylandygyny we Mingelowyň neşe gaçakçylygynda, ýagny alty kilograma golaý tirýek bilen tutulmakda aýyplanandygyny öňe sürdi.
"Kimdir biri munuň adam hukuklaryny goraýjydygyna, özüne bir zatlaryň oklanandygyna şübhelenýän bolsa ... Bäş kilogram oklanmaýar, siz muny gowy bilýärsiňiz" - diýip, Hajyýew neşiriň maglumatynda sitirlenýär.
Mansur Mingelowa garşy 2012-nji ýylda gozgalan iş onuň doganyna degişli bolan neşe söwdasy meselesi sebäpli tussag edilen wagtynda ýenjilmegini jogapsyz galdyrmazlyk kararyndan soň başlandy. Mingelow Türkmenistanyň prezidentine, prokuratura, ABŞ-nyň Aşgabatdaky ilçihanasyna we ÝHHG-niň edarasyna hat ýazyp, diňe bir ýenjilendigini habar bermek bilen çäklenmän, eýsem buluç etniki toparynyň agzalary babatynda edilen gynamalar barada maglumat ýollady.
Mingelow birnäçe jenaýat aýyplamalary esasynda 22 ýyl azatlykdan mahrum edildi we berk düzgünli koloniýa ýerleşdirildi. Aktiwist özüne ýöňkelen günäni ret etdi. Protest hökmünde Mingelow koloniýada açlyk yglan etdi we öz ýagdaýyna adam hukuklaryny goraýjy halkara guramalarynyň ünsüni çekdi.
Adam hukuklaryny goraýjylar, aktiwistiň tussag edilmeginiň asyl sebäbiniň, onuň Türkmenistanyň Sagdyn jemgyýetiň howpsuzlygyny goramak boýunça döwlet gullugynyň işgärleriniň we neşe polisiýasynyň jenaýatlaryny paş etmegi we bu maglumatlary köpçülige mälim etmegi bilen baglydygyny we häkimiýetleriň ondan ar alýandygyny aýdýarlar.
2021-nji ýylyň oktýabr aýynda Mingelowyň saglygynyň ýaramazlaşandygy belli boldy. “Turkmen.news” neşiriniň habar berşi ýaly, Mingelow inçekesel we saglygynyň gowşaklygy sebäpli güýçlenen osteomiýelit keseli bilen Lebap welaýatyndaky LB-K/11 berk režimli koloniýasynyň lukmançylyk bölüminde düşüpdir.
"Bendiniň 2012-nji ýylda tussag edilen wagty döwülen aýagy çüýreýär. Lukmançylyk bölüminde zerur dermanlar ýok, garyndaşlaryna COVID-19 karantin bahanasy bilen derman geçirmäge rugsat berilmeýär. Umuman Mansury halas etmek üçin başga, ýagny has gowy hasaplanýan Mary welaýatynyň MR-B/15 türme hassahanasyna geçirmek zerur. Ol ýerde ony 2018-nji ýylda bir gezek halas edipdiler" - diýip, Türkmen.news neşiri ýazypdy.
Tüssag aktiwistiň Türkmenistanda ýaşaýan maşgalasy hem häkimiýetleriň basyşyna sezewar boldy.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum