Türkmenistan türkmen-gazak serhedinde ýolagçylaryň gatnawyny çäklendirdi. Gazagystan bilen serhetleşýän Balkan welaýatyndaky gümrük nokadynyň resmileri munuň sebäbini Gazagystanda we Hytaýda “koronawirusa meňzeş dem alyş ýollarynyň ýokanç keseliniň ýaýraýandygy we syýahaty çäklendirmek barada ýokardan tabşyryk gelendigi” bilen düşündirýärler. Bu barada Azatlyk Radiosynyň habarçysy 9-njy ýanwarda sebitden maglumat berdi.
“Şu günler Gazagystana 10 günden üç aýa çenli aralykda wiza alan raýatlarymyzyň Gazagystan döwletine geçmegi kynlaşdy. Sebäbi häzir gümrük nokadynyň resmileri diňe milleti gazak bolan balkanlylaryň gümrükden geçmegine rugsat berýärler. Olaryň hem hemişelik ýurdy terk edýänlerine rugsat berilýär, gazanç maksadynda gidip gelýän balkanlylar gümrükden geçip bilýärler” diýip, ýagdaýlardan habar balkanly ýaşaýjy anonimlik şertinde gürrüň berdi.
Gazagystan bilen Türkmenistanyň arasyndaky gury ýer serhet araçägi 400 kilometr töwereginde bolup, gazak-türkmen araçäginde “Temir baba” awtomobil geçelgesi bar we bu ýerde adybir gümrük posty ýerleşýär.
Gazagystana gitmek üçin şu hepdäniň dowamynda bu gümrük postuna baran balkanlylaryň ençemesiniň tassyklamagyna görä, bu ýerdäki türkmen resmileri soňky çäklendirmeleri “Gazagystanda we Hytaýda koronawirusa meňzeş dem alyş ýollarynyň ýokanç keseliniň ýaýraýandygy” bilen düşündirýärler.
“Şu sebäpli bize syýahatçylaryň we ýolagçylaryň gatnawyny çäklendirmek barada ýokardan tabşyryk geldi. Siz iki hepdeden geliň, belki ýagdaý kadalaşsa, geçmegiňize rugsat bereris” diýip, 6-njy ýanwarda türkmen-gazak serhedinden geçmäge synanyşan balkanly ýaşaýjy türkmen gümrük resmisiniň aýdan sözlerini sitirledi.
Onuň tassyklamagyna görä, türkmen gümrükçileri ýolagçylara goňşy ýurtlarda dem alyş ýollarynyň keselleri giňden ýaýrasa, onda Türkmenistanyň öz serhetleriniň ählisini doly diýen ýaly ýapmak ähtimallygynyň bardygyny hem duýdurýarlar.
“Gümrük nokadyndaky keselleriň ýaýramagyna garşy göreş gullugynyň ähli işgärleri koronawirus pandemiýasy döwründäki ýaly wirusa garşy geýimlerde iş alyp barýarlar. Olar ýurda gelýän daşary ýurt syýahatçylaryny we türkmen raýatlaryny çuňlaşdyrylan görnüşde barlaýarlar” diýip, balkanly ýaşaýjy belledi.
Bu barlaglaryň dowamynda syýahatçylar diňe ellerini öwran-öwran ýuwandan soň, gümrük postunyň binasyna goýberilýär we olaryň gyzgyny ölçelýär, üstüne antiseptik serişdeler sepilýär.
“Daşary ýurtly sürüjilerden kowid ekpres we PCR testler üçin tölegler girizildi. Öň diňe ekpres test üçin bir töleg bardy, indi kowid testiň ähli görnüşi üçin töleg alynýar” diýip, balkanly ýük ulag sürüjisi anonimlik şertinde aýtdy.
Azatlyk ýokarda beýan edilen ýagdaýlar barada Balkandaky türkmen gümrükçilerinden teswir alyp bilmedi. Şeýle-de, redaksiýamyzyň sebitiň Arassaçylyk we keselleriň ýaýramagyna garşy göreşmek gullugy bilen telefon arkaly habarlaşmak synanyşyklary hem oňyn netije bermedi.
Türkmenistanyň häkimiýetleri, adatça bolşy ýaly, ýurtda we goňşy döwletlerde ýaýraýan ýokanç keseller barada ilata aç-açan maglumat bermeýär.
Bu barada ýurduň metbugaty hem dymýar. Şol sebäpli, dünýäniň iň bir ýapyk ýurtlarynyň hatarynda agzalýan Türkmenistanda häkimiýetleriň anyk haýsy ýokanç keselleriň ýaýramagyndan howatyrlanýandygyny anyklamak kyn bolmagynda galýar.
Ýöne bellesek, Bütindünýä saglyk guramasy we Ýewropa Bileleşiginiň Keselleriň öňüni almak we gözegçilik etmek boýunça merkezi 2024-nji ýylyň dekabryndan bäri Hytaýyň demirgazygynda adam metapneumowirus (hMPV) ýokanç kesellerini öz içine alýan dem alyş wirus ýokançlygynyň ýaýramagynyň ep-esli ýokarlanandygyny habar berdiler.
7-nji we 8-nji ýanwarda çap edilen maglumatlarda bu barada Hytaýyň Kesellere gözegçilik we öňüni alyş merkeziniň habar berendigi bellenilýär. Ýöne maglumatlarda bu ýokaçlyk bilen bagly hökümetleriň haýsydyr çäklendirmeleri, şol sanda syýahat çäklendirmelerini girizmelidigi barada hiç zat aýdylmaýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum