Ýewropanyň iň deňsiz-taýsyz medeniýet festiwallarynyň birine gatnaşmak üçin, milli egin-eşikdäki on müňlerçe adam Bolgariýada, uly oduň daşyna ýygnandylar.

Olaryň ählisi mobil telefonsyz we başga aragatnaşyk ýa tehniki enjamsyz. Diňe açyk tebigat hem adamlar, olar bütin gije tans edýärler. Bu Bolgariýanyň «Žerawna» atly täsin festiwaly. Ol şol ady göterýän obanyň golaýynda geçirilýär.

Milli egin-eşiklere bezelen bu halkara festiwaly Bolgariýanyň gündogarynda ýerleşýän Žerawna obasynda, 2008-nji ýyldan bäri her ýyl geçirilýär. Onuň berk şertleri bar.

Festiwalyň geçýän çäginde kameralary we mobil telefonlary ulanmak gadagan, oňa gatnaşmaga diňe milli egin-eşikde bolanlara ýa-da taryhy eşik geýenlere rugsat edilýär.

Beýle berk düzgüne garamazdan, belki-de, şolar sebäpli bu çäre Balkan sebitinde, tomusky iň meşhur festiwallaryň birine öwrüldi. Guramaçylaryň aýtmagyna görä, şu ýyl oňa 25 müňe golaý adam gatnaşdy. Bu baýramçylygyň taryhynda iň ýokary görkezijidir.

Baýramçylyga gatnaşyjy Ýewgeniý Çakarowyň sözi bilen aýdylanda, bu çäre «Bolgariýadaky iň meşhur bolgar wakasydyr».

Aýtmagyna görä, onuň birnäçe ýylyň dowamynda ýygnan egin-eşiginiň bahasy iki müň dollara barabar bolupdyr.

Bolgariýanyň Warna şäheriniň ýaşaýjysy Çakarow makedon däbinde geýnipdir. Ol muny özüniň "gowy görýän milli egin-eşigidigini" boýun alýar.

Festiwalyň geçirilýän çägine plastik gap getirmek gadagan.

Festiwalyň guramaçylary oňa gatnaşmak isleýänleriň "üç günüň dowamynda, tehniki täzeliklerden doly aýrylyşmaga we medeni köklere dolanmaga" taýýarlyk görmelidigini aýdýarlar.

Festiwalyň dowamynda iň gowy egin-eşikler we däp bolan bolgar tansy üçin bäsleşikler guraldy, şeýle-de, közüň üstündäki tans boldy.

Iň esasy dabaraly pursat äpet ot tutaşdyrylanda başlandy.

Agşam sagat 10-dan soň, müňlerçe adam el-ele berip, milli däpdäki tansy ýerine ýetirdiler. Ýüzýyllyk taryhyň dowamynda Bolgariýa üçin wepat bolanlaryň hatyrasyna elleri ýanýan kesindili adamlaryň gussaly ýörişinden soň, ol kesindileri ýeke-ýekeden oda atdylar.

Bu baýramçylyga halaşýan gyzy Liliana Twanowa bilen gatnaşan Walentin Wasilýew Azatlyk Radiosyna alawyň töwereginde bolan köpçülikleýin tansyň "biçak täsindigini" aýdýar: «Siz beýle güýji diňe şu ýerde, ýylda bir gezek alyp bilersiňiz».

Wasilýewiň aýtmagyna görä, oduň töwereginde müňlerçe nätanyş adamlar bilen tans edip ýörkä, ol özüniň "ata-babalarymyza dolaýan energiýa zynjyrynyň bir bölegine" öwrülendigini duýupdyr.