Pakistan häkimiýetleri oktýabryň başlarynda ýurtda bikanun ýaşaýan 1,7 milliondan gowrak daşary ýurtlynyň Pakistandan çykarylýandygyny yglan etdi. Azatlyk Radiosynyň Owgan gullugyna görä, 13-nji noýabrda çenli 300 müňden gowrak owganystanly bu ýurdy terk etdi. Owganystanda-da, Pakistanda-da etniki türkmenler kowçum bolup ýaşaýar.
Dünýä Türkmenleriniň nobatdaky sany owgan bosgunlarynyň Pakistandan deportasiýa edilmegine we bu ýagdaýyň fonunda bu ýurtlardaky etniki türkmenleriň meselelerine gönükdirilýär.
Biz bu tema boýunça etniki türkmenlerden bolan Owganystanyň ýaşaýjysy Hafizullany söhbetdeşlige çagyrdyk.
Pakistan bilen bir hatarda owgan bosgunlarynyň köplük bolup ýaşaýan ýurtlary bolan Eýran we Türkiýe hem owganystanlylary ýurtdan çykarýar.
2021-nji ýylyň awgustynda “Talyban” toparynyň Kabulda häkimiýeti ele geçirmeginiň yz ýany, 3,6 milliondan gowrak owganystanly daşary ýurtlara gaçdy.
2 million 500 müňden gowrak owganystanly iki ýyl ozal goňşy Eýrana bosup çykdy. Halkara migrasiýa guramasyna görä, häzirki wagtda 4,5 milliondan gowrak owgan Eýranda ýaşaýar. Ýöne Tähran bu sanyň 5 milliondan gowrakdygyny aýdýar.
BMG-niň Bosgunlar edarasynda görä, 2023-nji ýylyň dowamynda 700 müň çemesi owganystanly migrant ýa-da owgun bosgunlary goňşy Eýrany terk edip, Owganystana dolanmaly bolupdyr.
Soňky wagtlarda Türkiýe hem owganystanly bosgunlary ýurtdan çykarýar. Azatlyk Radiosynyň Owgan gullugynyň maglumatlaryna görä, soňky birnäçe hepdäniň dowamynda 4 müň töweregi owganystanly bosgun ýörite uçarlar bilen Türkiýeden Owganystana ugradyldy.
Forum