Azatlyk Radiosynyň çeşmeleri haj zyýaratynda 18 türkmenistanly zyýaratçynyň wepat bolandygyny habar berýärler.
Şu günler Türkmenistandan Saud Arabystany patyşalygynyň Mekge şäherine haj parzyny berjaý etmäge giden raýatlar ýurda dolanmagy dowam etdirýärler.
Zyýarat döwründe Mekge we Medine şäherlerinde howanyň aşa yssy bolmagy heläkçiliklere getirdi.
“Ildeşlerimiziň aýtmagyna görä, 18 türkmenistanly zyýarat döwründe aradan çykypdyr. Olar Mekge we Medine şäherlerinde howanyň yssysyna çydaman, özlerinden gidipdirler we şol ýerde jan beripdirler” diýip, çeşmeler aýdýar.
Saud Arabystanynyň saglyk ministrligi 23-nji iýunda üstümizdäki haj möwsüminde azyndan 1 müň 300 adamyň heläk bolandygyny mälim etdi.
Saud häkimiýetlerine görä, aradan çykan adamlaryň takmynan 83 göterimini aşa yssy howada uzak aralygy pyýada geçen rugsatsyz zyýaratçylar emele getirýär.
Azatlyk Radiosynyň habarçylary şu ýyl Türkmenistandan Saud Arabystany patyşalygyna haj zyýaratyny berjaý etmäge giden adamlaryň agramly bölegini öz serişdeleriniň hasabyna zyýarata giden adamlaryň emele getirýändigini aýdýarlar.
Mälim bolşy ýaly, Türkmenistandan her ýylda ençeme adam döwlet serişdeleriniň hasabyna haj parzyny berjaý etmek üçin Saud Arabystanyna iberilýär.
“Türkmenhowaýollary” agentligi 10-njy iýun – 9-njy iýul aralygynda öz serişdeleriniň hasabyna 289 zyýaratçyny zyýarata eltmek we yzyna getirmek bilen borçlandyryldy.
“Türkmenistandan haj parzyny berjaý etmäge giden adamlaryň sany öňki ýyllar bilen deňeşdirilende köp, hususan-da öz serişdeleriniň hasabyna zyýarata giden adamlaryň sany has köp” diýip, Azatlyk Radiosynyň habarçysy sanlardan habarly birnäçe ýaşaýjynyň beren maglumatlaryny getirdi.
Türkmen häkimiýetleri zyýarat döwründe hasaba alnan ölüm hadysalarynyň arasynda türkmenistanly raýatlaryň bolup-bolmandygyny mälim etmediler.
Türkmenistanyň döwlet media serişdeleri, şol sanda elektron neşirler hem zyýaratda hasaba alnan adam ölümleri barada habar bermeýär.
Geçen ýylda hem Türkmenistandan 289 zyýaratçy döwlet serişdeleriniň hasabyna haj parzyna iberildi.
2023-nji ýylda Türkmenistanyň Müftüsiniň müdiriýeti, haj möwsüminiň öňüsyrasynda, jemi 2312 türkmenistanlynyň haj parzyny berjaý etmek üçin Saud Arabystanyna syýahat edýändigini mälim edipdi.
Saud Arabystanynyň Haj we umra ministrligi dünýäniň her bir ýurduna, musulman ilatynyň sanyna laýyklykda, haj kwotasyny bölüp berýär. Hasaplamalara görä, her bir ýurtdaky 1000 musulmandan bir adama Saud Arabystany tarapyndan haj wizasy berilýär.
2023-nji ýylda dünýäde 1 million 800 müňden gowrak adam haj zyýaratyny amala aşyrdy.
Türkmenistanda esasan gurply hojalyklaryň agzalary haj zyýaratyna gidýär. Azatlyk Radiosynyň habarçylary şu ýyl haj çykdajylarynyň adam başyna 3000-5000 dollar aralygynda bolandygyny habar berýärler.
Öňler Türkmenistanda haj zyýaratynyň töwereginde resmiler we guramaçylar tarapyndan parahorlyk hadysalaryna baş goşulýan halatlary bolýardy. Habarçylarymyz indi bu ugurda para hadysalarynyň azalandygyny maglumat berýärler. Muňa garamazdan, resminamalaryň düzedilmegi üçin 500 dollar möçberinde tölegler tölenilýär.
Bu aralykda, ýurda dolanýan zyýaratçylar sadaka çärelerini guramalaşdyrýarlar.
“Haj parzyndan dolanyp gelen zyýaratçylar uly sadakalary berýärler. Bu sadakalara garyp adamlar baryp bilmeýärler. Käbir hajylar garyp dogan-garyndaşlaryny sadakalara çagyrmaýarlar.” diýip, bir türkmenistanly Azatlyk Radiosynyň habarçysyna gürrüň berdi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum