Balkan welaýatynyň käbir etraplarynda galla oragyna badalga berildi diýip, bu sebitdäki habarçymyz 3-nji iýunda maglumat berdi. Oba hojalyk hünärmenleri günbatar welaýatda bugdaýyň heniz doly bişip ýetişmändigini aýdýarlar.
31-nji maýda geçirilen hökümet mejlisinde Ahal, Lebap we Mary welaýatlarynda 7-nji iýunda, Balkan we Daşoguz welaýatlarynda 14-nji iýunda galla oragyna girişmek kararlaşdyryldy.
Muňa garamazdan, balkanly gallaçylar welaýatyň bugdaý ösdürip ýetişdirýän etraplarynda eýýäm oraga girişilendigini aýdýarlar.
“Bugdaý heniz doly bişip ýetişmedi, däneler heniz doly gatap ýetişmedi” diýip, bir ýerli agronom Azatlyk Radiosynyň habarçysyna gürrüň berdi.
Lebap welaýatyndaky habarçylarymyz gündogar sebitde 7-nji iýunda oraga girişilmegine garaşylýandygyny habar berýärler.
“Türkmenistanyň hronikasy” neşirine görä, şu günler sebitiň häkimlikleri, Türkmenabat galla önümleri kärhanasy, daýhan birleşikleriniň başlyklary we agronomlar welaýatyň bugdaý meýdanlaryndaky ýagdaýlary seljerip, ýörite hasabat taýýarlaýarlar.
Neşire görä, köp sanly ekerançylyk meýdanlarynda şu ýyl bugdaý hasyly ýagyşlardan zyýan çekipdir, zyýankeşler köpelipdir. Neşiriň sebitden çap eden suratlarynda ýere ýykylan bugdaýlary görmek bolýar.
Biraz öň, Azatlyk Radiosynyň habarçylary maý aýynda dowamly ýagan ýagyşlaryň netijesinde ýurduň günorta-gündogar sebitlerinde ekerançylyk meýdanlaryna, şol sanda bugdaý hasylyna zyýan ýetendigini habar berdiler.
Galyberse-de, Balkanda şu ýyl bugdaý meýdanlary pişikguýruk, süle ýaly haşal otlardan hem zyýan çekdi.
Balkanly kärendeçiler oraga ir girişilmegini bişip ýetişmedik çygly bugdaýyň terezilerdäki agramynyň ýokary görkezilmegi bilen düşündirýärler.
“Kombaýnlar yzygiderli ýagdaýda bugdaý meýdanlaryna goýberilýär. Samany heniz doly saralyp ýetişmedik bugdaýlary ormaklyk diňe emeldarlara bähbitli. Şeýlelikde, çig dänäniň agramy terezide ýokary görkezilýär” diýip, bir oba hojalyk işgäri Azatlyk Radiosynyň habarçysyna gürrüň berdi.
Türkmenistanda 10-njy maýda galla oragyny guramaçylykly geçirmek boýunça döwlet topary döredildi we onuň düzümi tassyklanyldy.
“Türkmenobahyzmat” döwlet birleşigi kombaýn üpjünçiligini ýola goýmaga, Ulag we aragatnaşyk agentligi ýygnalan hasylyň daşalmagyny üpjün etmäge borçly edildi. “Türkmengallaönümleri” birleşigine galla hasylynyň ýygnalmagynda döwlet we hususy eýeçilikdäki awtoulag serişdeleriniň hyzmatlaryndan, şertnama esasynda, peýdalanmaga ygtyýar berildi.
Ýatlasak, şu ýyl Türkmenistanda, 2024-nji ýylyň hasylyndan başlap, bugdaýyň döwlet satyn alyş nyrhy ýokarlandyryldy. 2018-nji ýylda bir tonnasy 800 manat hökmünde kesgitlenen döwlet nyrhy 2000 manada çykaryldy. 2018-nji ýyla çenli döwlet kärendeçi daýhanyň ösdürip ýetişdiren bugdaýynyň bir tonnasyna 400 manat töleg töleýärdi.
Bu aralykda, türkmen metbugatyna görä, prezident Serdar Berdimuhamedowyň 31-nji maýda gol çeken başga bir kararyna laýyklykda, 2024-nji ýylyň hasylyndan başlap, şalynyň hem döwlet satyn alyş nyrhy ýokarlandyryldy. Ýöne resmi maglumatlarda munuň bilen bagly täze nyrhlar aýan edilmeýär.
Maglumat üçin aýdylsa, Türkmenistanda kärendeçi daýhanlar şertnama esasynda özleriniň kärende ýerlerinde döwlet tabşyrygyna girýän ekinleri ösdürip ýetişdirýärler we ýygnalan hasyly döwletiň kesgitlän nyrhyndan döwlete satmaga borçlanýarlar. Ýurduň ekerançylyk meýdanlarynda şertnama esasynda esasan gowaça, bugdaý, şugundyr, ýeralma ýaly oba hojalyk ekinleri ösdürilip ýetişdirilýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum