Azerbaýjanyň howa ýollarynyň Russiýanyň Mineralnyýe Wody şäherine uçmaly uçary Bakuwdan ýola çykdy, ýöne rus howa giňişliginiň ýapylandygy barada habary alandan soň birden yzyna dolandy.
27-nji dekabrda bolan bu ýagdaý Azerbaýjanyň howa ýollarynyň Russiýanyň Groznyý şäherine barýan uçarynyň iki gün ozal Gazagystanda heläkçilige uçramagy bilen bagly ýagdaýyň daşyndaky kesgitsizligiň dowam edýändigini görkezdi. Heläkçilik zerarly uçardaky 67 sany ýolagçydan we ekipaž agzalaryndan 38 adam öldi.
Azerbaýjanyň howa ýollary soňra Russiýanyň ýedi şäherine, ýagny Mineralnyýe Wody, Soçi, Wolgograd, Ufa, Samara, Grozny we Mahaçkala uçuşlaryny togtatýandygyny mälim etdi.
Azerbaýjan howa ýollarynyň ýolagçy uçarynyň ýere gaçan ýerine 27-nji dekabrda Gazagystanyň hünärmenleriniň barmagyna we uçaryň gara gutusyny barlamagyna garaşylýar. Çaklamalar we subutnamalar Russiýanyň howa gorag raketasynyň bu uçary urup, gaçyrandygyny görkezýär.
Derňewler bat alýarka, uçarda raýatlary bolan ýurtlar - Azerbaýjan, Gazagystan, Russiýa we Gyrgyzystan ölenleriň hatyrasyna matam tutmak we "Embraer 190" kysymly uçaryň heläkçiligi zerarly ýaralananlary bejermek çärelerini dowam etdirýärler.
25-njy dekabrda heläkçilige uçran uçar Azerbaýjanyň paýtagty Bakuwdan Russiýanyň Çeçenistan sebitindäki Grozny şäherine meýilleşdirilen uçuş bilen ugrapdy we Gazagystanyň günbataryndaky Aktau şäheriniň golaýynda gyssagly gonmaga synanyşypdy.
Bu betbagtçylygyň daşyndaky dürli çaklamalar öňe sürülýär. Käbir hünärmenler uçaryň guýruk bölegindäki deşiklere ünsi çekip, ony uçaryň Russiýanyň ukrain pilotsyz uçarlarynyň hüjümleriniň öňüni almak bilen meşgullanýan howa gorag ulgamlarynyň ody astyna alynmagynyň alamaty hökmünde görkezýärler.
Adynyň efirde agzalmazlygy şerti bilen söhbetdeş bolan ABŞ-ly resmi heläkçilige uçran uçarda rus howadan goranyş sistemasy tarapyndan zarba urulmagynyň alamatlarynyň bardygyny aýtdy, ýöne bu barada jikme-jik maglumat bermekden saklandy.
Häkimiýetler tarapyndan entek tassyklanmadyk subutnamalar, uçaryň içindäki wideoýazgylary, uçaryň heläkçilikden soň guýruk böleginiň suratlaryny, diri galan adamlaryň beren gürrüňlerini we uçaryň Groznyda gonmaga synanyşan wagtynda urga sezewar bolandygyny görkezýän alamatlary öz içine alýar.
"Roýters" habar gullugy derňew bilen gönüden-göni tanyş azerbaýjanly çeşmäniň sözlerine salgylanyp, uçaryň Russiýada öndürlen "Pantsir-S" kysymly howadan goranyş sistemasynyň uçara garşy öz-özüni dolandyrýan raketa ulgamy tarapyndan urlandygy habar berýär.
Kanun çykaryjy Rasim Musabeýow Azerbaýjanyň "Turan" habar gullugyna beren teswirinde uçaryň Russiýanyň çäginde atylandygyny inkär edip bolmajakdygyny aýtdy.
"Muny eden adamlar jenaýat jogapkärçiligine çekilmeli, öwezini dolmaly. Bu bolmasa, elbetde gatnaşyklar başga derejä çykar" - diýip, azeri resmisi aýtdy.
Gara gutynyň ýazgylaryny öwrenmek işiniň nirede geçiriljekdigi entek belli däl.
Azerbaýjanyň oppozision "Musawat" hereketiniň lideri Gulag Aslanli Azatlyk Radiosyna beren interwýusynda bu wakany derňemek üçin halkara komissiýasynyň zerurdygyny aýtdy.
"Russiýa oňa goşulmaga rugsat berilmeli däl" diýip, Aslanli: "Gara guty Russiýa äkidilip, şol ýerde gözden geçiriljek bolsa, men onuň netijesine şübhe bilen serederin" diýdi.
Resmiler gara gutynyň doly barlanmagy üçin adatça iki hepde wagtyň gerekdigini aýtdylar, ýöne dürli şertler şol möhleti üýtgedip biler.
Kremliň metbugat sekretary Dmitriý Peskow "derňewiň gutarmagyna garaşmaly" - diýdi. Peskow derňewçiler öz netijelerini bermezden ozal çaklamak "nädogry" bolar diýdi.
Azerbaýjanyň Baş prokuraturasy "mümkin bolan ähli senariýalaryň gözden geçirilýändigini" aýtdy.
Azerbaýjanyň howa ýollarynyň gözegçilik geňeşi 26-njy dekabrda ölenleriň maşgalalaryna 40 000 manat ýagny 23 460 amerikan dollaryna, ýaralananlara 20 000 manat, ýagny 11 730 dollaryna barabar pul kömeginiň beriljekdigini aýtdy.
Resmileriň aýtmaklaryna görä, "J2-8243" reýsdäki ýolagçylaryň sanawynda 42 azerbaýjan raýaty bilen birlikde 16 rus raýaty, Gazagystanyň alty we Gyrgyzystanyň üç raýaty hasaba alnypdyr.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum