Türkmenistanda iş kesilen 463 bendiniň günäsi geçildi. Prezident Serdar Berdimuhamedowyň gol çeken degişli permany 15-nji aprelde döwlet metbugatynda çap edildi.
Hukuk goraýjy edaralaryň ýolbaşçylary günäsi geçilen adamlary tussaglykdan boşadyp, ýakyn wagtda öz öýlerine barar ýaly, zerur işleri geçirmek bilen borçlandyryldy.
Ýerli häkimiýetlere tussaglykdan boşadylýan raýatlary iş bilen üpjün etmek tabşyryldy.
Türkmenistanda iri baýramçylyklaryň we möhüm seneleriň öňüsyrasynda, türkmen kazyýeti tarapyndan iş kesilen adamlaryň ýüzlerçesi tussaglykdan boşadylýar.
Serdar Berdimuhamedow soňky bir ýylyň dowamynda Gadyr gijelerinde, garaşsyzlyk we bitaraplyk baýramçylyklarynda şu wagta çenli 2114 adamyň günäsini geçdi.
Yglan edilýän amnistiýalar Türkmenistanda “ata-babalaryň wesýet eden rehimdarlyk we ynsanperwerlik ýörelgeleri hem-de her bir maşgalanyň agzybirligini, bitewiligini pugtalandyrmak tagallalary” bilen esaslandyrylýar.
Türkmenistan türme ilatynyň sany boýunça dünýä ýurtlarynyň arasynda öňdäki orunlary eýeleýär. “World Prsion Brief” neşiriniň 2021-nji ýyl üçin çap eden iň soňky hasabatyna görä, Türkmenistanda her 100 müň adamdan 576 adam türmede saklanýar.
Şol bir wagtda, türkmen häkimiýetleri adamlary gorkuda saklamakda türmelerden peýdalanýarlar.
Ynsan hukuklaryny goraýjy halkara guramalar türkmen hökümetini adam hukuklaryny yzygiderli depelemekde we özge pikirli adamlary yzarlamakda aýyplaýarlar.
Şeýle-de, ynsan hukuklarynyň ýagdaýy boýunça halkara hasabatlarda Türkmenistandaky zorlukly ýitirim etmeler, polisiýa we türme resmileri tarapyndan gynamalar ýa-da rehimsiz we adamkärçiliksiz çemeleşmeler, agyr we adam ömrüne howp salýan türme şertleri, syýasy tussaglar, kazyýetiň garaşsyzlygy bilen bagly bar bolan problemalar babatynda alada beýan edilýär.
Nobatdaky günä geçişlikde syýasy matlaplar bilen tussag edilen adamlaryň, ýa-da daşary ýurt döwletleriniň Türkmenistanda iş kesilen raýatlarynyň bardygy ýa-da ýokdugy aýdylmaýar.
Mundan ozal, Bitaraplyk baýramy mynasybetli 2022-nji ýylyň dekabrynda yglan edilen amnistiýada, has ozal “syýasy matlaplar bilen” tussag edilen iki raýat, lukman Hursanaý Ismatullaýewa hem-de ýurist Pygambergeldi Allaberdiýew, türmeden boşadyldy. Şeýle-de, garaşsyz turkmen.news neşiri syýasy matlaplar bilen tussag edilen başga-da iki tussagyň, Mary welaýatynyň ýaşaýjysy Dmitriý Medwedewiň, hem-de Balkan welaýatynyň ýaşaýjysy Sereža Babaniýazowyň dekabrda tussaglykdan boşadylandygyny habar berdi.
Biraz öň, Garaşsyzlyk baýramy mynasybetli yglan edilen amnistiýada “neşe maddalaryny saklamakda” günäli tapylyp, 2016-njy ýylda 15 ýyl möhlet bilen azatlykdan mahrum edilen belli estrada aýdymçysy Nazir Habibow hem türmeden boşadyldy.
Ynsan hukuklaryny goraýjy halkara guramalar hususan-da soňky 20 ýyldan gowrak wagtyň dowamynda türkmen türmelerinde ençeme adamlaryň zorlukly ýitirim etmeleriň pidasy bolandygyny aýdýarlar.
Bu aralykda, Azatlyk Radiosynyň çeşmeleri we habarçylary Türkmenistanda möhüm seneleriň öňüsyrasynda yglan edilýän günä geçmelerde paranyň rol oýnaýandygyny habar berip gelýärler.
Döwlet metbugatyna görä, Türkmenistanyň prezidentiniň ýanynda Raýatlyk we günä geçmek meseleleri boýunça teklipleri taýýarlamak barada ýörite topar hereket edýär. Bu topara Döwlet howpsuzlyk geňeşiniň sekretary we goranmak ministri Begenç Gündogdyýew ýolbaşçylyk edýär.
Maglumat üçin aýdylsa, türkmen häkimiýetleri türmeden boşan raýatlary berk gözegçilikde saklaýar. Günäsi geçilýän raýatlary iş bilen üpjün etmek ýerli häkimiýetlere tabşyrylýar, ýöne Azatlygyň habarçylary öňki tussaglaryň güýç edaralary tarapyndan “gara donly” häsiýetlendirilip, dürli mümkinçiliklerden mahrum edilýändiklerini aýdýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň gizlinligini doly kepillendirýär.
Forum