Bu günler Lebabyň saglyk edaralarynda Aşgabatda Onkologiýa merkezini gurmak planlary bilen baglylykda propoganda äheňli wasp ediji ýygnaklar geçirilýär. Munuň bilen bir wagtda, welaýatyň düwnük, ýagny rak kesellerine garşy merkeziniň ýagdaýy gözgyny bolmagynda galýar we lukmanlar talaba laýyk bejergini berip bilmeýär.
“Şu hepdäniň başyndan bäri welaýatyň saglyk edaralarynda prezidentiň paýtagtda Halkara onkologiýa ylmy-kliniki merkezini gurmak baradaky karary bilen bagly yzygiderli öwgüli ýygnaklar geçirilýär. Medisina işgärleri oňa mejbury gatnaşdyrylýar. Şol bir wagtda, sebitiň esasy Onkologiýa hassahanasy ençeme ýyldan bäri opurylyp ýatyr, zerur bejergä mätäç näsaglaryň tas ýarpysy beýleki saglyk merkezlerine iberilýär” diýip, ýerli lukmanlaryň biri 16-njy fewralda Azatlyga gürrüň berdi.
Onuň sözlerine görä, 1968-nji ýylda gurlan Lebap welaýat Onkologiýa hassahanasyna mundan üç ýyl ozal sebite gelen gaý-harasatyň ýetiren weýrançylykly netijeleri häzirki güne çenli aradan aýrylmaýar.
“2020-nji ýylyň aprelinde gelen tupanyň netijesinde hassahananyň günbatar tarapyndaky blogunyň üçekleri uçdy, binanyň ähli bölümini suw basdy, diwarlar we pollar heňläp, çüýredi. Binanyň howply ýagdaýa gelmegi sebäpli, ony ýykmak kararyna geldiler” diýip, türkmenabatly lukman ýatlaýar.
Munuň yzy bilen, hassahananyň mümkinçilikleri çäklenenden soň, näsaglara aglaba diňe öýlerinde bejergi almagy üçin maslahat bermek bilen çäklenildi. Emma düwnük keselli hassalaryň has köp ýüz tutup başlamagy bilen, Türkmenabadyň Deri-wenerologiýa hassahanasynyň bir korpusy Onkologiýa merkezine berildi.
“Bu iki hassahananyň arasy 1 km-e golaý. Onkologiýa merkeziniň lukmanlarynyň we degişli abzallarynyň ýarpysy deri-wenerologiýa hassahanasyna göçürildi. Häzirki pursat ol ýerde 70-e golaý onkologiýa näsagyna bejergi berilýär. Bu ýeriň lukmanlary özleriniň onsuz hem çäkli şertlerde işleýändiklerini aýdyp, bu özgerişlere nägile bolýarlar” diýip, 50 ýaşlaryndaky lukman belledi.
Şol bir wagtda, ol baryp 2018-nji ýylda Lebapda täze Onkologiýa hassahanasyny gurmak boýunça planlaryň yglan edilendigini, emma şu günki güne çenli onuň gurluşygyna düýbünden girişilmändigini sözüne goşdy.
Ýokarda beýan edilen ýagdaýlar dogrusynda Lebabyň saglyk edaralaryndan, şol sanda Onkologiýa hassahanasyndan resmi kommentariýa almak başartmady.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum