Günortadaky Zaporižýa şäherinde bir klinika edilen rus hüjüminde ölenleriň sany, harabalyklaryň aşagyndan ýene bir adamyň jesediniň tapylmagy bilen, ýedi adama ýetdi diýip, Azat Ýewropa/Azatlyk Radiosynyň habarçysy 11-nji dekabrda, wakanyň bolan ýerinden habar berdi.
Ukrainanyň döwlet gyssagly kömek gullugy birnäçe sagat öň azyndan alty adamyň ölendigini, 22 adamyň bolsa ýaralanandygyny habar berip, halas ediş işleriniň dowam etdirilýändigini aýdypdy.
Adam güýji we ýarag meselesinde kösenýän ukrain güýçleriniň ruslaryň gündogarda edýän dowamly hüjümini togtatmak üçin görkezýän erjelliginiň arasynda, Russiýa gyşyň başynda ukrain şäherlerine we energiýa infrastrukturasyna edýän pilotsyz uçar, raketa hüjümlerini güýçlendirdi.
Raketa zarbasynda şäheriň merkezi nyşana alyndy diýip, baş prokuroryň edarasy aýtdy we onuň golaýdaky hususy klinikanyň we kafeniň ýerleşýän binasynyň ýykylmagyna sebäp bolandygyny belledi.
Urlan zarbanyň döreden tolkuny we ýykylan binanyň bölekleri köp gatly ýaşaýyş jaýlaryna, ulaglara zyýan ýetirdi diýip, beýanatda bellenýär.
Zaporižýa Russiýanyň raketa we pilotsyz uçar zarbalarynyň yzygiderli nyşana alýan şäherleriniň birine öwrüldi. 6-njy dekabrda bu şähere urlan zarbada 10 adam öldürildi.
Prezident Wolodymyr Zelenski 10-njy dekabrda Kiýewiň ýaranlaryna ýüzlenip, Ukrainanyň asmanyny doly goramak üçin zerur bolan “Patriot” howa goragy ulgamlarynyň ýene 10-12 sanysynyň berilmegine çagyrdy.
Zelenski ABŞ-nyň saýlanan prezidenti Donald Tramp bilen saýlawdan bäri geçiren ilkinji duşuşygynda Russiýa bilen alnyp barylýan urşuň bes edilmegi üçin geçiriljek islendik gepleşikde Ukraina üçin howpsuzlyk kepillikleriniň zerurlygyny nygtady diýip, "Roýters" habar gullugy 11-nji dekabrda iki sany çeşmä salgylanyp ýazdy.
7-nji dekabrda Parižde geçirilen duşuşyga Fransiýanyň prezidenti Emmanuel Makron beýemçilik etdi.
Iki ýurt hem, hem Ukraina, hem Russiýa, Tramp ýanwar aýynda ikinji prezidentlik möhletine başlamazyndan öň, özleriniň gepleşik pozisiýasyny güýçlendirmäge çalyşýar.
Trampyň üç ýyla golaý wagt bäri dowam edýän urşy "24 sagatda", Ak tama baran badyma durzaryn diýip beren wadalary Kiýewde, parahatçylygyň deregine, köp sebitiň Russiýa berilmegine basyş edilmek ähtimallygy barada alada döretdi.
Polşanyň premýer-ministri Donald Tusk, Kiýwiň Russiýanyň giň gerimli çozuşyna garşy alyp barýan goranyş urşunyň berk goldawçysy 10-njy dekabrda, Warşawanyň 1-nji ýanwarda Ýewropa Bileleşiginiň gezekli prezidentligini öz üstüne almaga taýýarlanmagy bilen, parahatçylyk gepleşikleriniň şu "gyşda" başlanyp bilinjekdigini aýtdy.
Tramp 9-njy dekabrda Wengriýanyň premýer-ministri Wiktor Orbany, Russiýa babatyndaky dostana sözlerini köp gaýtalaýan syýasatçyny myhman aldy. Wenger lideri bu duşuşykda parahatçylyk gepleşiklerine çagyrdy, Kiýewe harby kömek berilmegine we Moskwa garşy girizilen degişli sanksiýalara garşylygyny bildirdi.
Russiýanyň Goranmak ministrligi 11-nji dekabrda öz howa goranyş ulgamlarynyň Ukraina bilen araçäkleşýän Brýansk sebitinde 14 sany ukrain pilotsyz uçaryny urup gaçyrandygyny aýtdy.
Brýansk sebitiniň häkimi Aleksandr Bogomaz adyny agzaman, bir önümçilik desgasynyň ot alandygyny aýtdy.
Ukraina soňky aýlarda Russiýanyň içindäki harby nyşanalara garşy edýän pilotsyz uçar we raketa hüjümlerini güýçlendirip, esasan ýangyç ammarlaryny, howa meýdançalaryny we harby-deňiz desgalaryny nyşana aldy.
Zelenski 10-njy dekabrda Ukrainanyň goranyş kuwwatynda gazanylan wajyp ilerlemäni, täze döredilen “Ruta” raketasynyň üstünlikli synag edilendigini aýan etdi.
Zelenski täze raketa baradaky jikme-jiklikleriň hiç birini açmady. Ol 2024-nji ýylyň awgust aýynda ilkinji gezek söweş şertlerinde ulanylan uzak aralyk dronynyň, “Palýanitsýanyň” tapgyrlaýyn önümçilige başlandygyny hem habar berdi.
Mundan başga, prezident “Peklo” diýlip atlandyrylýan üçünji pilotsyz raketanyň öz “netijeliligini” görkezip, ilkinji söweş synagyndan üstünlikli geçendigini aýtdy. Ol bu raketalaryň ilkinji partiýasynyň ýakynda Ukrainanyň Goranmak güýçlerine gowşurylandygyny hem sözüne goşdy.
Şeýle-de, Zelenski ýakyn wagtda goşunlara gowşurylmagyna garaşylýan “Neptunyň”, uzak aralyga niýetlenen raketanyň “[Rus] basyp alyjylary üçin aýylganç reallyk boljakdygyny” belledi.
Forum