Siriýada jeňçiler paýtagt Damasky ele geçirendiklerini aýdýar. Jeňçiler soňky günlerde uly tizlik bilen hüjüme geçip, gysga wagtyň içinde ýurt boýunça öňe ilerlediler.
Damask “indi Assaddan azat” diýip jeňçiler 8-nji dekabrda sosýal mediada beýanat ýaýratdylar. Olar munuň bilen maşgalasy Siriýany 50 ýyldan hem aşa wagt hökmürowan dolandyran prezident Başar al-Assady göz öňünde tutdular.
Sosýal mediada paýlaşylýan wideolarda jeňçileriň prezident köşgüniň meýdançasynda we onuň giriş derwezesiniň öňünde jemlenen pursatlaryny synlasa bolýar.
Assadyň häzir nirededigi belli däl. Şol bir wagtda, düýbi Britaniýada ýerleşýän Adam hukuklary boýunça Siriýanyň gözegçi merkeziniň berýän maglumatyna görä, Assad 8-nji dekabrda irden uçar bilen Damasky terk edipdir. Onuň nirä ugur alandygy aýdyňlaşdyrylmaýar.
Bu maglumaty tassyklatmak başartmaýar. Emma Siriýanyň premýer-ministri Mohammad Ghazi al-Jalali wideo-beýanat ýaýradyp, onda hökümetiň “halkyň saýlan islendik häkimiýeti bilen hyzmatdaşlyk etmäge taýýardygyny” nygtady.
Haýat Tahrir al-Şam jeňçi toparynyň lideri Abu Mohammad al-Golani 7-nji dekabrda söweşijileriň Homsy “azat etmek boýunça jemleýji tapgyrdadygyny” aýtdy. Homsda 775 müň töweregi adam ýaşaýar.
Görnüşinden, şäher synandan soň, jeňçiler Homsdan 160 km günortada ýerleşýän Damaska tarap ugrapdyrlar.
Haýat Tahrir al-Şam jeňçi topary Birleşen Ştatlar, Britaniýa, Kanada we Ýewropa Bileleşigi tarapyndan terrorçy gurama hökmünde ykrar edilýär.
Ak Tamyň metbugat gullugynyň Azat Ýewropa/Azatlyk Radiosyna aýtmagyna görä, prezident Jo Baýden we onuň topary “Siriýada bolup geçýän adatdan daşary ýagdaýlara içginden gözegçilik edýär we regional hyzmatdaşlary bilen dowamly gatnaşyklary saklaýar”.
Forum