Aşgabatda adam pidalaryna getiren ýol hadysalarynyň ýene biri boldy. 14-nji maýdan 15-ne geçilen gije paýtagtyň 10 ýyl abadançylyk köçesinde bolan ýol hadysasynda ýedi adam heläk boldy.
"Betbagtçylyk iki awtoulagyň aşa ýokary tizlikde ýaryşyp barýarka biri-birine degip ýoldan çykmagy netijesinde ýüze çykdy. 'Toyota Camry' we 'Mercedes' kysymly ulaglar 100 metre golaý aralyga çenli togalanypdyrlar" diýip, Azatlyk Radiosynyň habarçysy waka şaýat bolanlara salgylanyp, 17-nji maýda aýtdy.
Heläkçiligiň bolan wagtynda ulaglaryň birinde üç, beýlekisinde dört sany oglan bardy. Olaryň üçüsi paýtagtyň ýokary okuw jaýlarynda okaýardy. Ýol hadysasynyň netijesinde ulaglardaky oglanlaryň ýedisi-de wakanyň bolan ýerinde aradan çykdy.
"Ýokary tizlikdäki ulaglaryň batly urgulary zerarly, oglanlar gaty weýran bolup ölüpdirler. Olaryň käbirini tanar ýaly bollmandyr. Ulaglaryň ýagdaýy hem gaty erbet bolup, olar göni zyňaýmaly ýagdaýdady" diýip, waka şaýat bolan bir aşgabatly ýaşaýjy anonimlik şertinde habarçymyza aýtdy.
Ýol hadysasynyň netijesinde köçäniň ugrundaky elektrik diňleriniň birnäçesi ýykyldy. Polisiýanyň derňew işlerinden soň, Parahat etrapçasynda ýerleşýän 8-nji Jaý dolandyryş edarasynyň işgärleri wakanyň bolan ýerini ýörite himiki serişdeler bilen ýuwdular.
"Işgärler ýagyň yzyna aýyrmak üçin köçäni köpükläp çykdylar. 15-nji maýda irden köçäniň belli bir bölegi ýapyldy" diýip, Jaý dolandyryş edarasynyň bir işgäri anonimlik şertinde aýtdy.
Azatlygyň ýokarda beýan edilen ýagdaýlar barada Aşgabadyň Polisiýa müdirligi bilen habarlaşyp, telefon arkaly kommentariýa almak synanyşyklary oňyn netije tapmady.
Bellesek bu, Aşgabatda ýaşlar tarapyndan aşa ýokary tizlikde dolandyrylýan ulagyň ýol hadysasyna uçramagy bilen bagly soňky bir aýdan hem az wagtyň dowamynda bolan ikinji wakadyr.
27-nji aprel gijesi şäheriň 30-njy etrapçasyndaky Gurban Durdy köçesiniň ugrunda bolan ýol hadysasynda aşa ýokary tizlikde dolandyrylan awtoulag ilki ýol böwedine, soňra-da golaýdaky zibil daşaýan ulaga kürsäp urdy. Şol wakada awtoulagyň içiniň ýaşlardan doludygy aýdylyp, onuň sürüjisiniň keselhana eltilenden soňra aradan çykandygy habar berildi.
Paýtagtdaky habarçylarymyz şäheriň köp etrapçasynda, hususan-da şaýollarynda ýaşlaryň aýdym-sazyň sesini batly açyp, ulagy aşa ýokary tizlikde dolandyrmagy we özaralarynda ýaryşmagy bilen bagly ýagdaýlara häli-şindi duş gelse bolýandygyny aýdýarlar. Käte bu ýagdaýlar adam pidalaryna getirýän ýol heläkçiliklerine sebäp bolýar.
"Şäheriň tas ähli ýerinde, şol sanda köçelerinde ýerleşdirilen gözegçilik kameralary hem ýaşlaryň bu howply hereketleriniň öňüni alyp bilmeýär" diýip, paýtagtdaky beýleki bir habarçymyz şu aýyň başynda aýdypdy.
Türkmen häkimiýetleri we köpçülikleýin habar serişdeleri ýurtda bolýan ýol heläkçilikleri ýa-da tebigy hadysalar barada maglumat bermekden onlarça ýyl bäri saklanyp gelýärler. Ýöne Azatlygyň habarçylary we garaşsyz neşirler adam pidalaryna getirýän köçe-ýol betbagtçylyklary barada ýygy-ýygydan maglumat berýärler.
Azatlygyň habarçylary şu aýyň başyndan bäri ýurduň dürli sebitlerine bolan ýol we otly hadysalarynda azyndan dört adamyň ölendigi barada habar berdiler.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
Forum